DILI, STLTIMORLESTE.com – Governu Indonezia liu husi Ministeriu Defeza oferese bolsa estudu ba Timoroan nain 10 atu estudu iha Universidade Defesa (Universitas Pertahanan-UNHAN) Ben Mboi neebe lokaliza iha Munisipiu Belu, Provinsia Nusa Tenggara Timur (NTT), Indonezia.
Adidu Defeza Indonezia nian iha Embaixada Republika Indonezia (KBRI) Dili, Koronel Arm Hengky Sweeto P.H hato’o kestaun nee ba STL iha ambitu ezame eskrita ba Timoroan nain 18 iha Centru Kultura Indonezia (PBI=Pusat Budaya Indonezia), Kaikoli, Dili, Sabadu (24/5/2025).
Nia dehan, Timor Leste ho Indonezia ninia kooperasaun iha area defesa halao dezde Timor Leste restaura nia Independensia iha tinan 2002 to’o agora lao diak. Tanba nee, Ministeriu Defesa Indonezia iha komitmentu atu hadia kapasitasaun no rekursu umanu maluk sira iha Timor Leste.
“Buat barak mak ami kolabora ona no lao dau-daun nee mak kursu iha instituisaun militár, nomeadamente iha Timoroan nain 4 neebé agora dau-daun halao hela estudu iha Akademia Forsa Armada Indonézia,” hatete Adidu Hengky Sweeto.
Adidu Hengky mos haktuir tan katak, tinan nee, Governu Indonézia liuhosi Ministériu Defeza Indonézia oferese hela bolsa estudu ba sidadaun Timor Leste hodi kontinua estudu iha Universidade Defeza Ben Mboi neebé lokaliza iha Munisipiu Belu.
“Ita hein katak alokasaun ba ema nain 10 nee sei util ba hadia rekursu humanu neebe tuir mai sei uza ba dezenvolvimentu nasaun Timor Leste.
Hau nia esperansa katak tanba selesaun ida nee mós difísil tebes, ita halo teste nee ho sériu no tenke kompromete hodi kompleta tinan 3 edukasaun no remata husi Universidade Defesa Ben Mboi Belu nee bele kontribui ba nasaun Timor Leste,” katak Adidu Hengky.
Iha sorin seluk, Adidu Edukasaun no Kultura iha KBRI Dili, Prof. Dr. Ikhfan Haris hatete PBI kolaborasaun ho Adidu Defesa nomos Ministeriu Defesa Indonezia halo selesaun etapa daruak ba Timoroan sira neebe hakarak kontinua sira nia estudu iha Universidade Defeza Ben Mboi iha Belu.
“Depois ami loke rejistu iha loron 12 fulan Maiu tinan 2025, ohin (Sabadu) halo selesaun etapa daruak ba sira neebe rezistu ona atu eskola iha Universidade Defesa Ben Mboi Belu. Ida nee hanesan teste potensia akademika ba estudante sira neebe liu ona selesaun arkivu no administrasaun. Maibe, husi ema nain 28 mak rezistu, ema nain 22 deit mak pasa. Husi total nee, ema nain 18 mak tuir selesaun etapa daruak nee no sira seluk rezignaan,” dehan Adidu Edukasaun, Ikhfan Haris.
Tuir nia, depois ezame eskrita nee, sira sei tuir selesaun datoluk mak teste oral ka interview (intervista) atu hili nain 10 neebe valor diak liu tuir bolsa estudu neebe oferese husi Governu Indonezia liuhosi Ministeriu Defesa Indonezia.
“Sira nain 18 neebe tuir selesaun etapa daruak nee sei kompete ba kadeira 10 neebe fornese husi Governu Indonezia liu husi Ministeriu Defeza Indonezia,” katak Adidu Ikhfan Haris.
Nia mos dehan katak, bolsa estudu ida nee prestijiadu liu tanba livre husi propinas, livre husi inskrisaun, loron ida han dala 3, osan bolsu no seguru ka asuransi. Sira nia estudu durante tinan tolu ho departamentu agrikultura, peska, mekanika no sel-seluk tan.
“Remata husi Universidade Defesa Ben Mboi Belu, sira fila fali mai Timor kontribui ba nasaun Timor Leste ho matenek neebe sira iha,” dehan Adidu Edukasaun Ikhfan Haris.
Aleinde halao selesaun ba Timoroan sira neebe atu estudu iha Universidade Defesa Ben Mboi Belu, PBI mos halao programa Lian Indonezia ba Objetivu Akademika ba Timoroan sira neebe univerisidade sira iha Indonezia simu ona atu kontinua sira nia estudu.
“Programa ida nee foin mak lansa no ami serbisu hamutuk ho Universidade Kristen Satya Wacana (UKSW) Salatiga, Indonezia. Dosente husi UKSW mak fo formasaun kona ba BITA nee,” tenik Adidu Edukasaun Ikhfan Haris.
Tuir nia, programa BITA diferente ho programa Lian Indonézia ba ema sira neebé koalia lian estranjeiru (BIPA=Bahasa Indonesia untuk Penutur Asing) no programa neebe se deit bele tuir. Maibe, programa BITA nee ba ema sira neebe atu kontinua sira nia estudu iha Indonezia. Antes sira halao sira nia estudu iha Indonezia, sira tenke hatene lian Indonezia ba objetivu akademika.
“Dosente UKSW nee mai hanorin sira iha PBI durante oras atus ida nia laran. Sira neebe atu estudu iha Universidade Defesa Ben Mboi mos sei tuir programa nee,” katak Adidu Ikhfan Haris.
Entretantu, dosente UKSW, Martha Nandari, akompaña husi nia asistente dosente, Elisabeth Habeahan, hateten ba STL katak UKSW kolabora ho PBI hanorin lian Indonézia ba objetivu akadémiku ba estudante sira neebe universidade sira iha Indonezia simu ona iha tinan 2025.
“Liu husi programa BITA nee, sira neebe universidade sira iha Indonezia simu ona iha tinan 2025, sira tenke hatene diak lai bahasa Indonezia akademik nian,” dehan Martha Nandari.
(mik)
