DILI, STLTIMORLESTE.com – Governu Timor Leste (TL) konsidera katak prezensa iha teritoriu nasional husi sidadaun Filipinu, Arnolfo Teves Jr. neebe deskonfia komete krimi grave oin-oin no hetan akuzasaun formal husi autoridades judisiais Republika Filipinas nian, nuudar situasaun ida neebe grave no inaseitavel.
Informasaun nee STL asesu liu husi Komunikadu Imprensa husi Gabinete Prezidente Konselhu Ministru (KM), Kinta (29/05/2025).
Iha komunikadu nee dehan, ninia estadia neebe naruk iha TL, liu tinan rua, bele hamosu problemas balun iha relasoins bilaterais entre Estadu rua nee no hatudu presedente ida neebe seriu ho implikasaun potensial ba seguransa interna.
“Persesaun katak TL bele haree hanesan refujiu ida ba individuu sira neebe halai husi justisa internasional, fo risku ba integridade husi ita nia fronteiras no esforsu hamutuk hodi kombate krime transnasional,” dehan Prezidente Konselhu Ministru, Agio Pereira.
Nia dehan katak, TL nia adezaun plena ba ASEAN neebe marka ona ba fulan Outubru tinan ida nee, reforsa liu tan responsabilidade Estadu TL nian, hodi koopera ativamente ho parseiru rejional sira iha defeza justisa, legalidade no estabilidade iha rejiaun nee.
Haktuir iha komunikadu nee katak, iha ambitu ida nee, Governu informa katak, sidadaun Arnolfo Teves Jr. sei deporta husi TL ho desizaun administrativa husi Ministeriu Interior, tanba nia iha rai laran la ho vistu validu, la ho autorizasaun legal atu hela no ho ninia pasaporte neebe Governu Filipinu kansela. Desizaun, ho efeitu imediatu, bazeia ba lejizlasaun nasional kona ba migrasaun no azilu no bazeia ba risku sira neebe sidadaun nia estadia hamosu ba orden publika no seguransa nasional.
Importante mos atu nota katak, sidadaun neebe iha kestaun hasoru akuzasaun kriminal oin-oin iha Filipinas, inklui akuzasaun omisidiu hamutuk 13, tentativa omisidiu 13 no omisidiu frustradu 4, relasiona ho krimi sira neebe komete entre tinan 2019 no 2023, inklui asasinatu ba Governador Negros Oriental, Roel Degamo, iha tempu neeba. Hodi konsidera faktu sira nee no tuir Lei Migrasaun no Azilu, nia mos hetan bandu atu tama iha territoriu nasional durante períodu tinan 10 nia laran.
Governu reafirma nia kompromisu ba prinsipius Estadu Direitu nian, hodi respeita norma internasional sira kona ba kooperasaun entre Estadus no salvaguarda seguransa no estabilidade laos deit ba territoriu nasional, maibe mos ba rejiaun Sudeste Aziatiku, hodi halo esforsu hamutuk ho Estadu membru sira ASEAN nian.
(jen)
