BAUKAU, STLTIMORLESTE.com – Governu liu husi Ministeriu Administrasaun ESTATAL hamutuk ho Autoridade Munisipiu Baukau, realiza konsultan sidadania ba prosesu planeamentu orsamental tinan fiskal 2026 nian, neebe atu foku ba nesesidade komunidade nian.
Reprezentante Governu husi Visi Ministru Administrasaun ESTATAL, Jacinto Rigoberto de Deus hateten, kada tinan iha nivel munisipiu realiza konsultan sidadania, tanba atu tetu prioridade ba kapasidade orsamentu ba tinan tuir mai.
Nunee iha loron 18 Marsu 2025, Governu sentral hamutuk ho Autoridade Munisipiu Baukau realiza konsultasaun sidadania ba prosesu planeamentu orsamental tinan fiskal 2026, hodi rona preokupasaun no problema neebe komunidade enfrenta iha baze husi Autoridade Postu no Suku.
“Ita haree ba ita nia kbiit rekursu hotu, liu-liu reskursu finanseiru neebe liga ba esperiensia tinan 10 resin ezekuta programa, ita tenke sukat hodi elabora planu ida nee, que elezidade justu no reflete duni ba nesesidade urjente nian,” hateten Rigoberto liu husi nia diskursu, bainhira partisipa sorumutuk konsulta sidadania ba prosesu planeamentu orsamental tinan fiskal 2026 iha Baukau, Tersa (18/03/2025).
Nia sublina, Politika IX Governu Konstitusional nian nuudar instrumentu ba dezenvolvimentu liu husi programa, planu no asaun neebe bele rezolve setor hotu hanesan edukasaun, saude, agrikultura, estrada, ponte, eletrisidade, bee moos no prioridade seluk tan.
Nunee realiza konsultan sidadania refere atu rona preokupasaun komunidade nian liu husi Autoridade Postu no Suku hodi enkaixa ba iha planu 2026 no tetu orsamentu hodi bele reflete ba nesesidade komunidade nian iha baze.
Tanba tuir lei enkuadramentu legal Orsamentu Jeral nian iha Nu. 02/2022 garante prinsipiu fundamental sidadaun sira nian, involvementu iha faze konstrusaun dezenvolvimentu.
“Ita nia povu nia lian mak tenke orienta diresaun dezenvolvimentu ba ita nia nasaun nian, liu husi konsultasaun ida nee mak akomoda lian sidadaun nian lori ba asaun ida konkreta mak ita hanaran planu asaun anual,” Rigoberto akresenta.
Enkuantu Prezidente Autoridade Munisipiu Baukau, Veneranda Lemos konsidera konsulta sidadania ba prosesu planeamentu orsamental tinan fiskal 2026 importante hodi rona aspirasaun, tanba Governu Sentral sei la halo planu asaun anual no tetu orsamentu rasik, bainhira seidauk rona preokupasaun liu husi konsultasaun.
“Kontestu munisipiu nian, ita hakarak programa saida ba ita nia rai, ita hakarak koalia dezenvolvimentu ba ita nia rai, liu husi konsultasaun ida nee mak bele fo biban,” hateten Veneranda.
Xefe Suku Fatulia, Angelo Moises Pereira hateten, kona-ba planu orsamentu tinan fiskal 2026, prezisa Governu tau atensaun ba setor saude, edukasaun no agrikultura, tanba sei falta fasilidade hodi responde ba Planu Estratejiku Dezenvolvimentu Nasional.
“Tolu nee setor neebe importante ba nasaun, prezisa tau orsamentu, tanba seidauk efetivu, tanba fasilidade saude balu ladun favoravel atende povu sira, fasilidade ba agrikultura mos sei menus nomos fasilidade ba edukasaun nian menus tebes oinsa bele hakbiit ita nia oan sira,” nia argumenta.
Nunee liu husi konsulta sidadania ba prosesu planeamentu orsamental tinan fiskal 2026 nian, Xefe Suku nee husu Autoridade Munisipiu Baukau prezisa haree kondisaun ba iha setor tolu (3) refere ba
planu orsamentu tinan fiskal 2026 nian.
Entretantu konsultan sidadania ba prosesu planeamentu orsamental tinan fiskal 2026 refere, hetan partisipasaun masimu husi diretores linha ministerial sira destaka iha Munisipiu Baukau, Autoridade Postu 8 no Xefe Suku 62.
(tom)
