BAUKAU, STLTIMORLESTE.com – Governu liu husi Ministeriu Obras Publiku (MOP) asina ona kontratu ho kompanhia lokal hamutuk 6, ba reabilita estrada rural hamutuk kilometru (Km) 12.5 iha Munisipiu Baukau.
Diretor Servisu Munisipal Obras Publiku Baukau, Agostinho Ximenes esplika, kontratu refere parte Governu ho kompanhia sira selebra iha loron 05 Novembru 2024, neebe ba projetu reabilitasaun estrada km 12.5 refere ho durasaun servisu tinan 1, tanba tuir kontratu neebe hatudu hahu servisu iha loron 15 Novembru 2024 too loron 15 Novembru 2025.
“Agora ita kontraktor sira prepara ona, balu komesa lori ona ekipamentus pezadus sira atu servisu lao ona, tanba orsamentu iha ona,” hatete Agostinho Ximenes ba jornalista sira iha knaar fatin, Kinta (09/01/2025).
Nia sublina, husi estrada km 12.5 kompostu pakote 6, neebe husi pakote 1-5 ho distansia km 10.5 implementa husi Suku Buibau-Samalari area Postu Administrativu Baukau Vila nian no pakote ikus liu implementa iha Suku Sagadate area Postu Laga nian.
Tuir selebrasaun kontratu pakote 5 iha Postu Baukau Vila implementa servisu husi Suku Buibau-Samalari, pakote dahuluk distansia km 0+000-2+000 responsabiliza husi kompanhia NENOVN5 Unip.Lda ho total orsamentu US$ 409,205.00, pakote daruak km 2+000-4+000 responsabiliza husi kompanhia LOVERBALEGA Unipessoal.Lda ho valor orsamentu US$ 407,603.39.
Pakote datoluk 4+000-6+000 responsabiliza husi MEXA Unipessoal.Lda ho orsamentu US$ 447,615.29, pakote dahaat 6+000-8+000 responsavel husi ALEFRANS XIMENES Unipessoal.Lda ho valor orsamentu US$ 465,028.05 no pakote dalima 8+000-10+500 responsabiliza husi ZILU VIFRE Unip.Lda ho valor orsamentu US$ 505,645.60.
Enkuantu pakote ikus daneen neebe implementa iha Postu Laga, area Suku Sagadate nian, husi Sirebu’u-Abuti km 2+000-4+000 reabilita husi kompanhia SICOLA Unip.Lda ho valor kontratu orsamentu US$ 448,714.07.
Nia akresenta, distansia estrada km 12.5 refere parte kompanhia sira sei halo reabilitasaun hanesan iha rai tetuk ho tipu makadam enkauntu parte suvida reabilita ho tipu plan.
Enkuantu Xefe Suku Samalari, Rui Magno Siqueira agradese ba Governu, tanba bele kontratu ona Governu lokal balun hodi responde problema kondisaun estrada.
“Agora daudaun kompanhia sira iha ona nee halo serimonia ritual depois mak sira servisu,” hateten Rui.
(EST 2)
