DILI, STLTIMORLESTE.com – Governu oras nee la fiar Timor oan sai asesor iha instituisaun estadu, tanba durante nee instituisaun estadu fiar liu ema estranjeiru sai asesor duke Timor oan.
Dehan Observador Politika, Martinho Viera ba STL iha nia knaar fatin, Kaikoli, Dili, Segunda (26/01/2026).
“Ita la hatene tanba sa mosu diskriminasaun hanesan nee, se rake fator kualidade ka fator integridade pesoal. Frakeza ita Timor mak nee la gosta nia maluk Timor oan atu moris diak, ka gosta mos kuandu Timor oan nee iha relasaun familia ho ukun nain sira,” dehan Martinho.
Ho nunee nia husu ba Timor oan hotu tenke hadia aan, hadia mental no hadia hasae badinas serbisu, atu nunee bele hetan oportunidade ba Timor oan wainhira iha.
“Ida seluk ita nia governantes gosta serbisu ho ema estranjeiru, tanba malae serbisu nonok no malae bele halo serbisu lalais tuir oras no tuir pedidu ukun nain nia hakarak ka gostu,”hatete observador politika nee.
Martinho mos fiar too tempu governante sira sei uza Timor oan iha fatin saida deit iha asesor no serbisu tekniku saida tanba timor oan barak mak kualifikadu ona, atu nunee bele aproveita fo serbisu hodi labele husik intelektual Timor oan sai audensia ka penonton hodi haree ema estranjeiru domina hodi sai asesor iha instituisaun estadu Timor, maski kualidade intelektual dala ruma Timor oan diak liu.
Iha parte ketak Akademista UNPAZ, Lorenco da Conceicao hatete, Timor oan barak esforsu aan no estadu fo bolsu estudu ba sira iha area oin oin, balu ba eskola iha area Portugues no ema balu gradua iha area Ingles nian. Kualidade Timor naton ona atu serbisu, kestaun agora ukun nain sira iha politika diak ba Timor oan ou hakarak Timor sai audensia intelektual iha sira nian rai rasik.
“Too ona Tempu ita nia Governu tenke hatur regras ka protokolu nasional, ida neebe maka bele uza nia rekursu umanu, laos uza hela deit ema estranjeiru iha instituisaun sira nee,” dehan Lorenco.
(car)
