DILI, STLTIMORLESTE.com – Bankada FRETILIN Konsidera IX Governu Konstituisional la iha ona responsabilidade moral no etika, tanba ema mate naba-naba iha hospital sira, maibe la buka solusaun neebe lais hodi hatan ba problema neebe iha.
Deputada Bankada FRETILIN, Nurima Ribeiro Alkatiri hatete, problema kona-ba falta aimoruk iha fasilidade saude daudaun nee kontinua eziste nafatin, maske liu husi orsamentu tinan 2024 governu liu husi Ministeriu Saude preve ona orsamentu hamutuk tokon US$ 12.4 atu sosa aimoruk barak liu kompara ho tinan sira uluk liu ba, maske nunee hospital no fasilidades saude sira kontinua halerik ba falta aimoruk.
“Situasaun ida nee halo todan liu tan sistema saude no nian konsikuensia mak taxa mortalidade aas ba beibeik iha Hospital Nasional too Sentru Saude sira. Situasaun ida nee hatudu Governu laos deit falha iha jestaun, maibe falha mos iha etika no moral. Bainhira husik deit ema mate iha Hospital no kontinua nega realidade todan ida nee,” hatete deputada Nurima Ribeiro Alkatiri iha ambitu debate OJE 2024 iha faze jeneralidade, iha PN, Kinta, (07/11/2024).
Governu ida nee tuir Deputada Nurima, lakon dever estadu nian atu proteje povu, tanba durante nee entidade hotu levanta beibeik problema iha setor saude, maibe governu seidauk iha seriedade atu rezolve problema neebe mak iha.
“Problema laos deit iha alokasaun orsamentu maibe problema boot liu mak atitude Governu nian relasiona ho krize neebe sistema saude hasoru. Envesde rekonhese katak sistema saude iha situasaun ida grave, maibe governu ho konsistente ignora ka husik deit situasaun nee akontese, pior liu tan tentativa husi forsa politiku neebe kaer ukun hodi proteje responsavel sira neebe lo-loos tenki responsabiliza ba falhas neebe akontese,” hatete Deputada nee.
Tanba tuir nia, situasaun sira nee hotu kontribui ba aumenta numeru mortalidade iha hospital sira, aumenta frustrasaun jeneralizada iha komunidade nian leet kona-ba servisu saude publika no hamihis ka halakon konfiansa publiku nian ba sistema saude iha Timor Leste.
(alb)
