DILI, STLTIMORLESTE.com – Konfedesaun Sindikatu Timor Leste (KSTL) husu ba Governu neebe lidera husi Primeiru Ministru (PM), Kay-Rala Xanana Gusmão atu labele budu proposta ba hasae salariu minimu trabalhador sira nian iha TL, tanba presiza hasae trabalhador sira nia salariu.
“Ita durante nee hamutuk ho Sekretariu Estadu Formasaun Profisional no Empregu (SEFOPE) halo proposta ba Governu liu husi meza Konselhu Ministru nian, maibe too agora seidauk iha rezultadu, signifika proposta neebe submete Governu budu deit iha meza leten,” dehan Prezidente KSTL, Almerio Vila Nova ba jornalista sira iha Salaun Luz Clarita, Dili, Kinta (21/11/2024).
Tanba tuir nia, proposta hasae salariu minimu neebe submete ba Governu atu hasae salariu trabalhador sira, nunee bele asegura trabalhador sira nia nesesidade, nunka iha responde pozitivu husi Governu liu husi desizaun Konsellu Ministru, nunee konsidera katak proposta nee budu deit Governu nia laran, neebe laiha aprovasaun.
Situasaun salariu minimu nee la bazeia ba kondisaun trabalhador sira nian, liu-liu US$ 115 nee garante, nunee husu atu aumenta salariu minimu sae ba US$ 150 too US$ 200, liu-liu ba trabalhador iha setor privadu sira neebe servisu iha loja Xineza, tenke hasae sira nia salariu.
Salariu minimu nee hamenus beban maoria ba trabalhador ho nia familia sira, tanba salariu la sufisiente, entaun ezije nafatin ba Governu atu simu proposta neebe KSTL hamutuk ho SEFOPE lori ona ba meza Governu, liu husi Konselhu Ministru nian atu haree hodi aprova, nunee trabalhador sira iha setor privadu sira bele moris ho salariu neebe konduzivu.
Iha sorin seluk, Trabalhador Timoroan neebe servisu iha setor privadu loja Xineza, Armina Fernda Lopes hatete, servisu neebe hanesan trabalhadora halo iha setor privadu sira, liu-liu loja Xineza ho salariu minimu US$ 115 deit, maibe hanesan trabalhadora kontinua servisu, tanba nesesidade uma laran obriga.
Antes nee Sekretariu Estadu Formasaun Profisional no Empregu (SEFOPE), Rogério Mendonça promete iha tinan 2025 altera Lei Trabalhu numeru 4/2012, loron 21 fulan Fvereiru, hodi hadia lei salariu minimu ba trabalhador sira.
Husi proposta Orsamentu Jeral Estadu (OJE) 2025, ba SEFOPE liu husi programa funsionamentu no dezenvolvimentu prevee orsamentu hodi haree ba lejizlasaun sira hanesan alterasaun lei trabalhu, lei kontra asadiu mundu trabalhu neebe prepara hela atu submete ba Konselhu Ministru.
(EST 1)
