BAUKAU, STLTIMORLESTE.com – Governu liu husi Sekretariadu Tekniku Administrasaun Estatal (STAE) nasional lansa ona sistema Biometriku ba kartaun eleitoral iha Munisipiu Baukau.
Informasaun nee hatoo husi Diretor STAE Munisipiu Baukau, Natividade Freitas Guterres ba STL iha edifisiu STAE Baukau, Kuarta (30/10/2024).
“Biometriku abertura nasional nee halo ona iha Manatuto no semana 3 liu ba ami tuir ona formasaun iha nasional, tanba nee abertura Biometriku nian iha Baukau,” dehan nia.
Natividade fundamenta, intensaun husi sistema Biometriku refere atu moderniza sistema atendimentu STAE nian no periodu kada eleisaun, tanba sistema eleitoral Semi Biometriku difikulta parte STAE husi numeru votantes boot iha lista, maibe partisipasaun menus, tanba eleitores neebe mate ona Autoridade Suku sira la submete lista hodi parte tekniku elimina husi sistema.
Aleinde mos atu minimiza kartaun eleitoral dupla iha sistema, tanba antes nee eleitores balun tenta halo kartaun iha Munisipiu 2 ho numeru eleitoral neebe difirente uza ba nesesidade privadu, maibe sistem Biometriku atual sei la akontese, tanba trata kartaun eleitoral ba Biometriku utiliza sistema inter ligadu neebe presiza dokumentus husu notariadu hanesan sertidaun nasiomentu, Bilhete Identidade no Pasaporte.
Nia sublina, sistema Biometriku refere sei fasilita mos sidadaun sira ba trata dokumentu, hanesan Konta Bankaria no seluk tan iha Banku la presiza tan kartaun eleitoral foto kopia, tanba bele utiliza barkode.
“Sistema foin lansa, tanba ligasaun ho linha internet entaun ita sei koko semana ida atu hatene kada loron atende ema hira, nunee fo sai ba publiku,” Natividade akresenta
Diretor STAE Munisipiu Baukau nee deklara, trata kartaun eleitoral husi Semi Biometriku ba Biometriku sei sei lori prosesu durante 24 oras, tanba prosesu sei halo sinkronizasaun dadus iha teritoriu laran tomak hafoin halo imprime fo ba nain, tanba antisipa dupla iha sistema.
Nunee husu eleitores sira hakbesik aan ba edifisiu STAE hodi trata kartaun eleitoral refere husi Semi Biometriku ba Biometriku bainhira atendimentu ba publiku hahu ona.
“Agora la hanesan ona uluk, uluk lakon ita bele titip tuir ema seluk mai foti, maibe agora lae, tanba sidik jari foto mos foun hotu,” Natividade hateten
Nia agrumenta, parte STAE Munisipal mos planeia ona atu kobre Postu Administrativu hotu iha Baukau, neebe tuir orariu kada postu durante loron 10 hodi fasilita liu tan sidadaun sira ba mudansa eleitor, tanba Governu promete durante tinan 2 nia laran hahu husi 2025-2026, eleitores iha teritoriu nasional utiliza hotu ona kartaun eleitoral ho sistema Biometriku.
Entretantu total eleitores neebe STAE rejistu husi Suku 59 iha Munisipiu Baukau liu rihun 100, neebe seidauk sura ho sidadaun feto mane idade 17 seidauk iha kartaun eleitoral.
(EST 2)
