DILI, STLTIMORLESTE.com – Governu liu husi Konselhu Ministru (KM) nomeia Anita Tavares Ribeiro de Jesus sai hanesan Komisaria Funsaun Publika (KFP).
Reuniaun Konselhu Ministru Kinta nee (21/11/2024) aprova projetu rezolusaun Governu neebe aprezenta husi Ministru Prezidensia Konselhu Ministru, Agio Pereira, ba nomeasaun Anita Tavares Ribeiro de Jesus ba KFP.
Anita ba Komisaria Funsaun Publika (KFP) hodi ezerse mandatu tuir rejime dedikasaun eskluziva, nuudar Komisaria Funsaun Públika, too loron 22 Novembru tinan 2028.
Iha parte seluk, tuir projetu sira neebe aprezenta husi Ministru Obras Públikas, Samuel Marçal, Konselhu Ministru delibera hodi autoriza despeza ba konstrusaun edifísiu eskritóriu andar neen ba Ministeriu Obras Publikas, no edifísiu andar ida besik ba Laboratóriu Enjeñaria Sivíl, ho kustu besik millaun US$ 20.
Autoriza despeza ba reabilitasaun no manutensaun seksaun estrada entre Seloi, Aileu no Gleno, Ermera, ho naruk km rihun US$ 18, ho valór obra neebé prevee milhaun US$ 15,97.
Autoriza despeza ba reabilitasaun no manutensaun ba seksaun estrada entre Lospalos no Lautein, ho naruk km 27.980, ho valór obra neebe prevee milhaun US$ 22,7.
Autoriza despeza ba reabilitasaun no manutensaun ba seksaun estrada entre Lautein no Kom, ho nia naruk km 19.760, ho valor obra neebe prevee milhaun US$ 13,8.
Autoriza despeza ba reabilitasaun no manutensaun seksaun estrada entre kruzamentu Letefoho no Gleno, ho naruk km 24.140, ho valor obra neebe prevee milhaun US$ 45.
(gui)
