DILI, STLTIMORLESTE.com – Governu hasai orientasaun ba munisipiu sira atu selebra loron eroi Timor Leste, tanba nee Ermera sei halao tuir orientasaun. Husu komunidade kria estabilidade iha Natal no tinan foun.
Prezidente Autoridade Munisipiu (PAM) Ermera, José Soares hatete, simu ona orientasaun atu selebra loron erois iha Dili.
“Ami simu ona orientasaun husi governu, liu husi Ministru Administrasaun Estatal (MAE) atu selebra ka komemora loron erois iha 31 Dezembru, nunee karik iha aifunan mak ami selebra fali, depede tinan tuan 2024 no simu tinan foun 2025”, katak PAM Ermera, José Soares ba STL liu husi telefone, Kuarta (18/12/2024), iha Ermera.
Aleinde nee, PAM Ermera husu populasaun Ermera tomak, liu-liu juventude atu mantein estabilidade.
“Nuudar Prezidente Autoridade Munisipiu husu ba populasaun hotu katak, matein kria estabilidade, tanba ita hakarak selebra loron boot ho hakmatek no dame”, tenik PAM Ermera.
Tuir nia, pas ho dame mak nuudar ita nia kultura neebe ita tenke kaer ba kultura, oinsa atu respeita ema seluk, nia vida, no koidadu mos idak-idak nia vida hodi labele halo asaun violentu, asaun krimi, tanba hahalok née estraga futuru. Tanba nee nafatin husu populasaun tomak kria pas no estabilidade.
(gui)
