DILI, STLTIMORLESTE.com – Governu hamutuk ho parseiru internasional sira halao enkontru aliansa ba transformasaun, kona-ba asesu finansiamentu klimatiku ba saude iha Timor Leste (TL).
“Agradese ba Reprezentante Organizasaun Mundial Saude (OMS) iha Timor Leste ho nia ekipa ba koordenasaun ho SEARO hodi sai uma nain ba enkontru importante ida nee, kona-ba asesu ba finansiamentu klimatika ba saude iha ita nia rain,” hatete Visi Primeiru Ministru, Ministru Koordenadór ba Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino ba jornalista sira iha Hotel Hilton Fatuhada, Dili, Tersa (25/02/2025).
Nia dehan, mudansa klimatika laos deit kestaun ambiental, ida nee krize saude ida. Ba nasaun ilha kiik ida hanesan Timor Leste, mudansa klimatika laos deit dezafiu ida, maibe nuudar ameasa ezistensial no realidade loron-loron nian.
“Inundasaun, rai-maran, rai-halai, hasae nível tasi nian mak realidade sira iha ita nia nasaun, ida nee ikus mai lori ba biodiversidade no interupsaun ekosistema, diminuisaun produsaun agríkola, aumentu inseguransa ai-haan, falta bee, destruisaun infraestrutura, afeta kualidade, dezlokasaun umanu, lakon vida no afeta saude umanu iha maneira oin-oin. Hau laiha duvida katak atrazu liu tan iha kombate mudansa klimátika sei aumenta risku saude sira nee, sobu, melhoria sira iha dekada barak iha saude global no lokal no kontra ita nia kompromisu koletivu ba saude ba ema hotu,” nia esplika.
Nia tenik, presiza asaun urjente sira atu promove saúde no harii sistema saude neebe reziliente liu ba klima, sustentavel ba ambiente, no ho karbonu kiik. Governu Timor Leste komprometidu tomak atu avansa inisiativa klima no saude.
Iha fatin hanesan, Reprezentante Organizasaun Mundial Saude iha Timor Leste, Arvind Mathur dehan, enkontru Tekniku Rejional Organizasaun Mundial Saude (OMS) Sudeste Aziátiku nian kona-ba Mudansa Klimatika no Saude, daudaun nee halao iha Timor Leste, husi loron 25–28 Fevereiru 2025. Enkontru nivel aas ida nee halibur delegadu sira husi membru nasaun10, OMS Sudeste Aziatiku nian, espesialista husi OMS nia eskritoriu sentral no rejional, no mos reprezentante sira husi ajensia doador no parseiru kolaborativu sira.
Nunee mos Visi Ministru Saude ba Operesionalizasaun Ospitalár, Flávio Brandão hatoo nia apresiasaun ba OMS, Rejiaun Sudeste Aziátiku neebe hili Timor Leste sai uma nain ba enkontru importante ida nee.
(jen)
