BAUKAU, STLTIMORLESTE.com – Vise Primeiru Ministru Mariano Assanami Sabino hateten, Governu planu ona atu estabelese lampu iha estrada ninin hahu husi Munisipiu Manatuto too Lautem hodi fasilita movimentu kalan.
Deklarasaun nee Vise Primeiru Ministru Mariano Assanami Sabino hatoo liu husi nia diskursu iha seremonia lansamentu fatuk dahuluk ba projetu konstrusaun merkadu Munisipal Baukau neebe realiza iha Vila Nova Baukau, Kinta (12/02/2026).
“Ohin temi ona kona-ba lampu iha estrada neebe ohin ami koalia ona parese masimu too Marsu komesa hahu ona husi Manatuto lampu estrada nian tenke book ona, laos too deit iha Baukau Vila maibe tesik too Laivai neeba,” Karak Vise Primeiru Ministru Mariano Assanami Sabino.
Governante nee hateten, ba instalasaun lampu refere, Governu liu husi Ministeriu Planeamentu no Investimentu Estratejiku (MPIE) halo ona preparsaun sei implementa iha fulan Marsu tinan nee.
Nia komenta, esforsu Governu nian ba asuntu refere atu fasilita movimentasaun komunidade sira ho transporte publiku no privadu inklui ema lao ain sira iha tempu kalan.
Iha fatin hanesan, Prezidente Autoridade Munisipiu Baukau Veneranda Lemos mos hateten, Kondisaun estrada husi Portu Administrativu Vemasi liga ba Postu Administrativu Baukau Vila diresaun husi Kaisidu too area Ladun no estrada diresaun husi Suku Triloka ba Ostiku daudaun nee estrada kaber ona, maibe falta instalasaun lampu iha estrada ninin.
“Tau netik eletrisidade husi Kairavela tama too Aeroportu nunee mos husi Triloka ba Venilale, tanba komunidade barak hela iha estrada ninin, maibe ahi la lakan, nee perigu tebes ba ema lao ain sira,” Veneranda katak.
Tuir Prezidente Autoridade Munisipiu Baukau katak, diresaun estrada husi Postu Vemasi too Baukau Vila no husi Triloka ba too iha Ostiko no Vemasi, komunidade barak hela iha estrada ninin, maibe iha parte estrada ninin kontinua nakukun, tanba seidauk estabelese lampu mezmu iha ona enerjia eletrisidade.
Nia konsidera, husi kondisaun estrada ninin neebe iha rin eletrisidade, maibe tempu kalan iha area estrada nian nakukun fo impaktu ba komunidade lao ain sira, tanba nee husu Governu Sentral instala lampu iha estrada ninin atu nunee fasilita liu tan komunidade lao ain sira iha tempu kalan.
(tom)
