DILI, STLTIMORLESTE.com – Governu liu husi Ministru Interior (MI) halo ona planu atu reforma ba membru Polisia Nasional Timor Leste (PNTL) neebe moras permanente.
Nia dehan, ida nee foku liu ba membru sira neebe kondisaun fiziku labele hodi halo servisu iha Intutisaun PNTL, tanba kondisaun moras.
“Agora ida nee enternus saúde halo sira labele halo servisu ona, balun toba deit iha uma, balun tanba uluk halo servisu hodi rezulta kanek neebe ke labele halo servisu, hetan tratamentu hela deit. Entaun prontu ita dehan lae tempu ona para imi tenke fila ba deskansa. Sira nee sei reforma iha 2026,” hatete Ministru Interior (MI), Francisco da Costa Guterres ba jornalista sira iha nia knaar fatin MI, Kuarta (14/01/2026).
Governante nee informa, maske sira nee pasa ona ba reforma iha tinan nee, maibe Governu sei la taka matan ba sira no sira sei simu nafatin sira nia direitu ba reforma.
“Sira nafatin hetan asesu ba reforma, se lae kuitadu sira la mai servisu sira halo saida. Kuandu sira la mai servisu nee koa sira nia osan, maibe kuandu sira ba reforma para ita fo sira ba reforma,” nia deklara.
Nia tenik, durante nee tuir dadus neebe mak Komando PNTL Ministeriu Interior iha duni membru PNTL barak mak nia saúde la diak tanba moras.
“Balun moras neebe ke labele lao, balun moras neebe ita nia ain sira nee tuur deit iha kadeira roda, balun toba deit, entaun ita tenke halo buat sira nee hotu,” katak nia.
Ministru Interior nee relata katak, membru PNTL neebe mak agora daudaun hetan sofre moras permante iha mak ema kuaze 100 resin.
“PNTL haruka tiha ona ba hau ona, hau simu ona, neebe ami hein deit despaisu legál kuandu sai ita publika iha Jornál Republika para depois ami hahu prosesu hodi halo reforma ba sira,” nia esplika.
Nia hatutan, daudaun nee Ministeriu Interiór haree no halo ona prosesu, tanba nee ba membru PNTL neebe moras saude labele ona atu halo servisu la inklui membru PNTL na’in 158 neebe molok Governu anteriór haruka ba reforma pois Governu dasia haruka sira tama fali.
Nia koalia, sira nee sei reforma iha 2027, sira ida nain 158 pesoál neebe antes nee reforma fali mak Governu haruka taka fali hodi halo funsaun nee Governu sei halo reforma iha tinan 2027 sira nee reforma normal.
Iha fatin ketak, fontes konfirmadu deklara, Governu atu halo reforma membru neebe moras permanente tenke reforma ho dignu, tanba kondisaun moras nee mak sira la halao nia knaar.
“Ita nia governu atu halo reforma ba membru PNTL neebe moras tenke ho dignu, tanba ami antes seidauk moras ami mos halao ami nia servisu hanesan baibain, komu kondisaun moras lao la diak entaun hakarak ka lakohi tenke reforma ho dignu mak diak,” nia afirma.
(jen)
