DILI, STLTIMORLESTE.com – Ministru Juventude Desportu, Arte no Kultura (MJDAK), Nelio Isaac hatete, Governu iha planu atu konstrui estadiu futeból iha Tasi-Tolu.
Ministru Juventude Desportu, Arte no Kultura, Nelio Isaac ba jornalista sira, bainhira remata relata preparasaun eventu Dili Internasional Maratona ba Prezidente Republika Jose Ramos Horta, iha Palasiu Prezidensial Nicolau Lobato Bairo Pite, Kinta (25/09/2025).
“Governu agradese ba komentariu no opiniaun sira husi sosiedade sivil inklui igreja, maibe Governu iha nia planu hatuur katak Tasi-Tolu nee atu konstrui estadiu Futebol neebe bele involve ema barak, bele halo mos atividade internasional iha ita nia rai nomos ita nia tim atu joga, por enkuantu Governu lao hela iha situasaun nee, hau dehan lao hela situasaun nee atu dehan saida, dehan katak ministeriu relevante sira liu-liu ministeriu 3 neebe servisu hela ba ida nee, hanesan Ministeriu Planeamentu no Investimentu Estratejiku, Ministeriu Justisa ho Ministeriu Juventude Desportu, Arte no Kultura,” dehan Ministru.
Ministru hatete, tanba saida Ministeriu Planeamentu no Investimentu estratejiku, Ministeriu Justisa ho Ministeriu Juventude Desportu, Arte no Kultura involve? Tanba husi federasaun Footbol hakarak harii estadiu iha Tasi-Tolu nee ho intensaun PP, setor publiku no privadu.
“Setor privadu no setor publiku mos tama iha neeba, osan balun husi FIFA, osan balun husi Governu, entaun ida nee estudu halo didiak, estudu legalidade, nomos kona-ba investimentu no nia retornu ita haree, maibe Governu nafatin loke aan rona opiniaun mai husi Igreja,” katak Ministru.
Ministru hatete, oras nee daudaun Igreja fo hanoin ba Governu katak fatin Tasi-Tolu nee fatin istoriku, tanba eventu 3 neebe importante para haree hanesan fatin neebe relijioza no potensia ba turizmu mos.
Tasi-Tolu fatin primeiru neebe uluk halo restaurasaun independensia iha 20 Maiu 2002, neebe Amu Papa nia reprezentante fo bensaun ba bendeira RDTL iha fatin neeba, segundu Amu Papa João Paulo II vizita fatin neeba, ikus liu Papa Francisco vizita Tasi-Tolu neebe fatin nee Igreja sente katak hanesan jardin relijioza neebe loke ba ema hotu, no Governu mos konsidera opiniaun sira nee.
“Ita konsidera mos opiniaun husi sosiedade sivil balun mos hanesan, maibe hau atu dehan katak mezmu hanesan nee ita sei lao hela, ita nia dalan atu hanoin atu konstrui estadiu, karik iha buat ruma neebe foun, klaru Governu sei informa ba publiku kontinua ou lae? Tanba nee ikus fali, agora daudaun ita lao hela koridor tanba ministeriu 3 servisu hela, hotu ona sei informa fali bai ta boot sira,” katak Ministru Isaac.
Jornalista: Emerenciana Pinto
Editor: Xisto Mendonça
