BAUKAU, STLTIMORLESTE.com – Governu Portugal liu husi nia embaixada iha Timor Leste sei reabilita edifisiu antigu rua (2) iha Munisipiu Baukau.
Prezidente Autoridade Munisipiu Baukau, Veneranda Lemos haktuir, semana liu ba Ministru Administrasaun Estatal, Tomas do Rosario Cabral realiza enkontru ho Embaixadora Portugal nian iha Timor Leste, Manuela Bairos, koalia kona-ba apoiu Governu Portugal nian mai Timor Leste.
Durante enkontru embaixadora Portugal relata, Governu Portugal komitmentu apoiu Timor Leste, neebe sei apoiu reabilita edifisiu rua iha Munisipiu Baukau, kompostu edifisiu ba biblioteka publiku neebe sei reabilita edifisiu antigu sira iha Vila Antiga, maibe hili ida no reabilitasaun seluk mak sala maternidade portuguêsa Reamare iha Suku Bahu, Postu Baukau Vila.
“Governu Portugal liu husi embaixada iha programa ida atu fo apoiu mai Baukau atu halo reabilitasaun ba edifisiu antigu iha Baukau neebe Embaixadora mai haree tiha ona ho ekipa UNFPI atu halo reabilitasaun utiliza ba biblioteka. Ida fali tan mak reabilitasaun maternidade iha Reamare,” hateten Veneranda Lemos ba STL iha Vila Nova Baukau, Kinta (29/05/2025).
Autoridade Munisipiu Baukau nee agradese ba apoiu tomak, tanba bele apoiu edifisiu biblioteka publiku iha Baukau neebe sei fo espasu ba komunidade tomak liu-liu labarik estudunte sira atu lee barak.
Enkuantu maternidade antiga Reamare Autoridade sei planu atu utiliza, tanba sei iha prosesu laran hafoin termina ona projetu mak deside, maibe sei kontinua utiliza ba asuntu saude nian.
Autoridade Munisipiu Baukau nee hateten, kona-ba data implementasaun projetu rua refere nia parte seidauk hatene klaru, tanba dezisaun enkontru entre Ministru ho Embaixadora Portugal.
“Depende diskusaun entre embaixadora ho Ministeriu, tanba ita iha munisipiu seidauk iha poder politika, entaun asuntu liga desizaun aas ke munisipiu seidauk bele foti, entaun reabilitasaun bainhira mak atu akontese, klaru akontese iha tinan ida nee, maibe fulan saida mak ita seidauk hatene,” informa Veneranda Lemos.
Enkuantu implementasaun projetu reabilitasaun refere Governu Portugal aloka orsamentu pur volta US$ 150,000.00 neebe tuir planu sei implementa iha tinan nee, maibe prosesu tomak nivel ministeriu mak hatene.
(tom)
