DILI, STLTIMORLESTE.com – Governu presiza asegura ka proteje fatin sagrada Altar Santu Tasi Tolu, tanba fatin nee saseluk Nai Jesus Kristu nian tun dala rua hodi prezide misa ba Timoroan tomak.
Deputadu husi Bankada FRETILIN, Antoninho Sarmento hatete, Altar 2 Tasi Tolu nee fatin sagrada, presiza proteje halo lutu ka moru haleu area neeba, no halo mos infraestrutura diak halo hanesan muzeum no tau nia istória tomak husi Papa João Paulo II no Papa Francisco nian, nunee ema barak bele vizita haree fatin nee.
“Asegura fatin nee, halo moru atu ema labele halo atividade oin-oin, no halo infraestrutura diak ho nia istória sira sei bele atrai ema barak, liu-liu turista sira”, katak Deputadu Antoninho Sarmento ba STL, Kuarta (16/10/2024), iha PN.
Reprezentante povu nee dehan, governu presiza koordena ho igreja nunee konserva ona fatin nee hodi halo fatin nee sai fatin mais kotroladu organizadu ho estrutura tomak. No asegura fatin nee nafatin ba jerasaun ba jerasaun mai.
“Tanba Papa nain 2 nee saseluk Jesus Kristus nian, neebé tun mai ona fo sarani ba fatin nee, nomos mai hodi hametin ema Kristaun sira nia servisu fiar”, tenik Deputadu Antoninho.
Tuir nia, presiza tebes halo moru haleu, nunee bele evita fatin sagradu nee ema labele halo atividade neebe tuir sira nia hakarak.
Nudar reprezentante husu ba governu katak, asegura fatin neeba, labele husik deit atu akontese hanesan Altar uluk Santu Padre João Paulo II nian neebe husik livre, maibe agora tenke asegura fatin 2 nee, hodi ema labele halo atividade oin-oin iha fatin sagrada nee.
Entretantu Ministru Administrasaun Estatal (MAE), Tomás Cabral hatete, kona-ba kestaun nee konfirma ho Primeiru Ministru (PM), tanba iha ona desizaun husi PM katak atu halo moru haleu, maibe klaru liu konfirma ho PM.
(gui)
