DILI, STLTIMORLESTE.com – Bankada CNRT husu Sekretariu ba Asuntu Toponimia no Organizasaun Urbana (SEATOU) atu halo uluk dialogu ho komunidade sira neebe afeita ba eviksaun iha Bekora relasiona ho alargamentu estrada husi Kuluhun too Fatu-Ahi.
“Hau hanoin presiza iha komunikasaun diak ho populasaun sira neebe afetadu ho situasaun nee, tanba hakarak ka lakohi sira nee mesak povu Timor nian,” hatete Deputadu CNRT, Duarte Nunes ba jornalista sira iha resintu Parlamentu Nasional, Tersa nee (04/03/2025).
Nia hatutan, Governu antes nee deside ona alargamentu estrada nee ho 3 metru no agora aumenta tan nee tenki halo uluk dialogu ho populasaun sira, wainhira aseita ona mak bele halo alargamentu no labele obriga deit populasaun sira.
“Nee interese nasaun nian, entaun tenki komunika ho ema, xefe suku, administrador postu sira iha para organiza oinsa bele buka solusaun ba problema nee, laos foin kolia deit lori kedas ekipamentu pezadu ba suru kedas,” tenik nia.
(alb)
