DILI, STLTIMORLESTE.com – Relasiona ho politika Governu Konstitusional, presiza halo investimentu ba setor produtivu hanesan turizmu, nunee bele dada aspirasaun turista internasional no nasional atu ba vizita.
“Ita presiza duni halo investimentu ba setor potensial sira, liu-liu setor turizmu iha Timor Leste (TL), tanba ho objetivu atu dada turista sira bele mai vizita, oinsa bele kontribui ba makro ekonomia husi setor turizmu nian,” dehan Akademika husi Universidade Oriental Timor Lorosa’e (UNITAL), Andre da Costa Piedade ba STL iha Bekora, Dili, Sesta (25/10/2024).
Tuir Akademika nee, setor turizmu nee sai parte importante duni atu bele investe, no oinsa bele dezenvolve diak, tanba husi setor refere bele fo kbiit ba estadu atu halao nia servisu.
Setor barak mak daudaun nee planu Governu ladun fo atensaun, liu-liu setor turizmu, barak iha teritoriu nasional maibe ladauk boot, setor agrikultura, kreatividade hanesan agrikultura iha ona.
Maibe Governu nia apoiu ba sira mak sei menus, tuir lo-loos setor produtu sira nee tenke hahu investe ona, nunee bele prienxe kriteria TL sai membru Association of Southeast Asian Nation (ASEAN).
Entretantu estudante husi Universidade Nasional Timor Lorosa’e (UNTL), area Ekonomia no Turizmu, Felisbela da Cuinha afirma, setor turizmu nee sai pontu prinsipal ida ba Estadu TL, atu halo dezenvolvimentu neebe diak.
Tanba haree husi setor turizmu, tuir esperiensia sira neebe iha katak, nasaun balun riku laos tanba mina, maibe riku tanba iha politika ba investimentu setor turizmu nian, nunee governu tenke tau osan hodi bele dezenvolve setor produtivu sira nee ho diak.
“Ita fiar katak setor turizmu kuandu dezenvolve ona, mak numeru dezempregu mos sei minimiza, tanba setor turizmu sai mos hanesan kampu trabalhu ida ba sidadaun hotu, no sai sentru turistiku ba turistores sira atu mai vizita, hodi selu mos taxa ba kofra estadu Timor Leste nian,” nia sublina.
Entretantu Visi Primeiru Ministru no Ministru Koordenador Asuntu Ekonomia no Ministeu Turizmu no Ambiente, Francisco Kalbuadi Lay dehan, setor turizmu iha TL importa atu halo investimentu, maibe importante liu mak setor infrastutura sira, hanesan estrada, kuandu diak no kondisionavel mak fasil atu dezenvolve setor turizmu iha rai laran.
Tanba halo dezenvolvimentu ba setor turizmu iha Timor Leste presiza duni atu prioritiza, oinsa bele dezenvolve ho diak, atu kontinua halo mudansa ba setor turizmu sai fatin neebe influensiadu no atrai turista sira husi internasional no nasional bele mai vizita TL.
(EST 1)
