DILI, STLTIMORLESTE.com – Governu liu husi Ministeriu relevante hanesan DNTT nomos polisia tranzitu presiza kontrola kareta privadu sira neebe laiha parkirang hodi okupa espasu publiku hodi hamosu engarrafamentu.
Visi Diretor HAK, Antonino de Limas ba jornalista sira iha knaar fatin Farol, Kinta (26/02/2026) hatete, Governu liu husi Ministeriu relevante sira presiza halo kontrola ba kareta neebe iha uma laiha fatin parkirang hodi okupa fali iha estrada publiku, ikus hamosu engarrafamentu.
Visi Diretor hatete, dala barak iha bairu sira nee maluk neebe utiliza kareta privadu maibe iha uma laiha fatin para, entaun sira okupa estrada publiku hodi para, ikus bele hamosu engarrafamentu motor ho kareta neebe liu inklui mos ema lao ain.
“Iha Dili iha bairu sira kareta no motor laiha parkirang, entaun bele hatete presiza regulariza, nunee hirak neebe iha kareta privadu tenke iha fatin hodi para, labele okupa fali estrada publiku hodi hamosu engramentu no ema lao ain mos susar, ida nee ligadu ho kareta neebe para iha uma laiha fatin okupa fali estrada publiku,” dehan Visi Diretor Hak.
Nia dehan, iha bairu balun kareta hotu para netik iha dalan, ida nee mos difikulta movimentu lao ain nomos hamosu engarrafamentu.
Nia mos husu ba Governu liu husi Ministeriu neebe mak tutela ba ida nee presiza haree no kria regra ruma hodi regulariza kareta neebe iha, nunee idak idak bele para iha nia fatin, labele okupa fali dalan publiku hodi para kareta.
“Presiza regra mos bainhira sira neebe la kumpre tenke hakruk ba lei neebe iha,” dehan Visi Diretor HAK.
Nia hatete, durante nee mosu engarrafamentu parte ida mos kareta ho motor sira neebe para fatin laiha ou parkiran laiha, entau maluk sira neebe utiliza kareta motor obrigatoriu utililiza fali espasu publiku, lo-loos nee Governu establese fatin parkiran hanesan iha loza sira iha Kolmera presiza iha fatin parkirang.
Seluk mos iha uma dala ruma laiha parkirang entau maluk sira utiliza fatin publiku hodi para kareta no motor entaun bele hamosu engarrafamentu, tanba nee Governu liu husi Ministeriu relevante presiza haree ba asuntu sira nee.
Nunee mos komunidade Grigorio Almeida hatete, Governu presiza kontrola kareta no motor neebe para iha estrada nini sira nee, tanba ida nee bele hamosu engarrafamentu, no kareta balun mos para permanente iha estrada ninin sira, ida nee Governu presiza haree.
“Dala ruma estrada kloot ona maibe para tan kareta okupa fali estrada, entaun dala ruma kareta hasoru malu susar, ida nee presiza haree tanba iha bairu sira kareta no motor barak para iha estrada ninin tanba iha uma laiha fatin parkirang entau okupa estrada hodi para,” katak nia.
Nia hatete, kareta privadu balun dala ruma laos para iha uma maibe dala ruma mos para sala iha Halte neebe Governu prepara ona, lo-loos nee Halte oin nee mikrolet sira mak para hodi hatun pasajeiru no tula pasajeiru maibe dala barak kareta privadu sira nee mak para netik entaun halo mikrolet sira susar atu para.
Iha fatin seluk, Diretora DNTT, Maria Antonia Vitor da Costa husu komunidade sira atu labele para kareta no motor iha Halte oin, tanba iha Halte oin nee distinadu ba transporte publiku sira atu para atu hatun no tula pasajeiru sira iha Halte oin.
“Tanba nee husu labele para iha Halte oin, se para iha Halte oin intrupe ona movimentu pasajeiru ho transporte publiku sira neebe mak para iha neeba,” katak nia.
Nunee mos foin lalais Polisia Nasional Timor Leste liu husi atividade diresaun Tranzitu Seguransa Rodaviariu (DTSRN) iha loron 15 fulan Janeiru 2026 halo operasaun iha area Bairo Pite too Bekora foti obrigatoriu komunidade sira nia kareta neebe para iha estrada publiku estasionamentu permanente.
(eme)
