MAUBARA, STLTIMORLESTE.com – Governu presiza tau atensaun ba Setor Saude, tanba oras nee publiku kestiona kona-ba atendimentu.
Kestaun nee hatoo husi Eis Deputadu CNRT, Cejar Valentin de Jesus ba jornalista sira iha Maubara, Sesta nee (20/06/2025).
Nia hatete, problema saude laos agora mak hasoru, desde uluk kedas hasoru problema maibe sei diak, ida ohin loron mak grave liu, tanba nee Governu presiza haree hodi tau atensaun.
“Tuir ami nia observasaun ita nia problema saude laos foin mosu, maibe ida nee grave, ida ikus liu nee mak grave, primeiru Governu ita iha ona sistema neebe bele orienta ita ba objetivu ida nee, lori ita nia sidadaun ba moris ida saudavel, tanba ita koalia saude mais realidade ita mai too fali IX Governu mak ita enfrenta fali situasaun inserteza, ita nia saude nee inserteza tanba tratamentu lori ita nia sidadaun halai ba halai mai deit, ba Malazia, ba Singapura, mai Indonezia, ate mai fali Atambua ida ke iha Indonezia ida kee aat liu,” dehan Eis Deputadu CNRT.
Eis Deputadu dehan tuir ninia observasaun grafika preokupasaun ba sidadaun sira tun liu, tanba nee nia husu Nunu Governu foti desizaun seriu ba sistema saude iha rai laran.
“Governu tenke foti desizaun ida seriu para lori ita nia sistema saude nee koko mosu iha nivel internasional ho ita nia postura ida neebe diferente oituan katak ita labele toman komersial vida, ita buka oinsa mak serbi ba ema, tanba Maromak haraik ema nee kompletu, ema mak sai nain ba buat hotu ba rai, bee,” katak Nia.
Nia hatete, agora daudaun komersializa fali vida ou faan vida, konsulta iha Hospital Nasional Guido Valadares lalos aimoruk laiha ba sosa fali aimoruk iha klinika privadu sira, ida nee fiar Maromak nee modelu oinsa.
Eis Deputadu CNRT tenke halo tratamentu dignu no tuir Maromak nia orietasaun, tanba nee Eis Deputadu husu Primeiru Ministru atu haree assuntu saude.
“Se hau mak Primeiru Ministru hau taka klinika privadu no hospital privadu tenke taka, doutor sira fo salariu ba sira too tinan fo feriadu lao ba rai liur imi serbi povu ho diak para hatudu postura imajen ba mundu katak diferente no haree ema mak hanesan nain ba mundu nee laos komersializa ema ka faan ema saude ba intrese osan ida nee mak tuir hau nia haree orietasaun estadu nee faila iha saude,” katak nia
Nunee mos veteranus Roberto Nunes kodigu Ramahana husu ba Governu atu tau atensaun ba setor saude, nunee bele fo atendimentu neebe mak diak ba povu iha rai doben ida nee.
“Mensajen ba Governu hodi tau matan iha setor saude, tanba ohin loron povu barak mate, tanba nee mak hanesan mos povu husu nafatin ba Governu tau matan ba saude, nunee bele halo atendimentu diak ba povu kiik sira,” deha nia.
(eme)
