DILI, STLTIMORLESTE.com – Ministru Defeza Kontra Almirante, Donaciano do Rosário da Costa Gomes “Pedro Klamar Fuik” hateten, Ministeriu Defeza prevee osan milhaun US$ 5 hodi halo manutensaun ba roo patrullamentu rua Jaco no Betano.
“Osan manutensaun ba roo rua nee iha osan milhaun US$ 5,” hatete Ministru Defeza (MD) Kontra Almirante, Donaciano do Rosário da Costa Gomes “Pedro Klamar Fuik” ba jornalista sira iha Ministeriu Defeza Fatuhada Dili, Tersa (17/03/2026).
Nia esplika, empreza neebe responsavel ba manutensaun roo rua nee mai husi empreza Xina, neebe haree ba iha industria konstrusaun roo nia.
“Responsavel bb manutensaun roo rua nee mai husi kompanhia Xina, neebe iha industria ba konstrusaun roo nian, ida nee mak hetan oportunidade atu halo manutensaun ba ita nia roo rua nee,” nia informa.
Governate nee garante katak manutensaun ba roo patrulha Jaco no Betano sei konklui iha tinan ida nee.
“Oras nee daudaun iha prosesu manutensaun no ita fiar katak fim do ano roo rua nee prontu ona opersaun fila fali, tanba prosesu manutensaun ida agora ita halo nee prosesu manutensaun muito profunda sei troka nia motór sira neebe mak aat tiha ona sei hadia, nia kulit sei hadia, nia sistema sira hotu-hotu nee falha sei hadia hotu,” nia koalia.
Nia esplika, iha fulan neen mai nee roo ida sei prontu uluk ho manutensaun neebe oin seluk no ho nia kualidade neebe diak, roo nee nia kondisaun sei sai foun fali.
“Ita espera tinan nee roo rua nee sei konklui nia manutensaun hodi halo fali opersional,” nia afirma.
(jen)
