ERMERA, STLTIMORLESTE.com – IX Governu Konstitusional neebe lidera husi Primeiru Ministru (PM), Kay Rala Xanana Gusmão sei hahu konstrusaun estrada husi Postu Administrativu Gleno ba Postu Administrativu Letefoho too Postu Administrativu Atsabe, Munisipiu Ermera, iha tinan nee.
Tanba nee mak iha Sabadu (08/02/2025), Primeiru Ministru, Kay Rala Xanana Gusmão akompanha husi Ministru Obras Publika, Samuel Marçal hamutuk ho ekipa hahu halao sosializasaun ba komunidade afetadu no autoridade sira iha Gleno, Ermera no Letefoho kona-ba implementasaun projetu nee bainhira tempu udan para.
IX Governu liu-husi MOP halo ona estudu no sei hahu dezenvolve estrada ho pakote tolu mak hanesan, pakote dahuluk sei hahu hadia uluk estrada husi Gleno ba Ermera no Latefoho, pakote daruak husi Letefoho ba Atsabe no pakote datoluk husi Atsabe ba Haubá, Munisipiu Bobonaro.
Primeiru Ministru, Kay Rala Xanana Gusmão informa, estrada nee halo tuir Planu Estratejiku Dezenvolvimentu Nasional (PEDN) 2011-20230 neebe define ona hodi lori povu sai husi mukit atu asesu ba estrada nasional no rejional.
“Hau kontente tebes tanba Xefe Suku sira organiza povu afetadu sira atu kolabora, nune‘e ita halo estrada, rezolve tiha problema povu nian durante nee,” Xanana Gusmão hateten durante diálogu aberta ho populasaun sira iha Aldeia Nunutali, Suku Humboe, Gleno, Sabadu (08/02/25).
Iha dialogu nee populasaun afetadu no autoridade sira konkorda hodi halo deklarasaun bá Xefe Governu no MOP katak prontu simu dezenvolvimentu estrada neebe tinan barak sira hein hela.
Nunee sira aseita bainhira loke luan estrada metru 10 kona populasaun sira-nia kintal hanesan kafe, sei la husu indemnizasaun.
“Hau mai iha nee atu sai sasin ba imi hotu katak, imi promete ita hamutuk hadia imi nia moris,” PM Xanana hateten.
Iha fatin hanesan, Ministru Obras Publikas, Samuel Marçal informa, tekniku sira finaliza ona servisu no hein tempu udan remata, iha fulan Abril 2025, Governu bele halo lansamentu bá estrada tuir pakote neebe define ona.
“Depois IX Governu kaer ukun, estrada Ermera ita tau prioridade kedan, maibe ita hakarak rezultadu estrada idak-idak ho kualidade. Ita presiza tekniku sira halo dezenhu, estudu no konta didiak depois mak ita bele implementa. Tanba rai Ermera la hanesan ho rai seluk, tahú rai monu makaas, valeta no ponte barak aat no lakon ona,” Samuel Marçal hateten.
Tanba nee, MOP halo revizaun ba dezenhu sira han tempu oituan, no agora halo hela tenderizasaun ba projetu estrada ida nee mak boot tebes-tebes.
Oras nee daudaun iha hela prosesu tenderizasaun, no Ministru rasik koalia ho Primeiru Ministru hodi aselera prosesu iha aprovizionamentu no espera iha fin fulan Abril bele asina kontratu hodi implementa.
Governu sei fo oportunidade ba kompanhia internasionál neebe manan projetu tenke mobiliza uluk ekipamentu pezadu sira hodi hahu prepara kondisaun hotu-hotu tuir kontratu.
“Husi pakote rua, pakote ida estrada husi Gleno ba too Letefoho no pakote rua husi Humboe ba too Ermera Lama no iha mos pakote ida mai ka bá fali husi Atsabe no sei halo mós ponte balu,” nia hateten.
Kona-ba projetu eletrisidade nian, Konselhu Ministru aprova suku tomak iha Timor Leste no iha Ermera falta suku tolu no aldeia balu iha tempu besik sei dada linha eletrisidade tama bá populasaun nia uma.
Tuir relatóriu EDTL iha tinan 2025 too 2026 nia laran, MOP sei konklui projetu estrisidade sei lakan iha suku no aldeia hotu.
Iha fatin hanesan, Xefe Suku Humboe-Gleno, Fransisco B. Salsinha reprezenta autoridade lokál sira, hatoo agradese tebes ba esplikasaun husi PM Xanana no Ministru Samuel hodi realiza promesa hadia povu nia moris liu husi asesu bá estrada.
“Hau lori povu Ermera liu-liu Suku Humboe agradese boot tebes bá Avo Nana no Ministru Samuel nee too ona mai iha nee atu konsidera estrada husi Gleno ba too Letefoho too Atsabe. Ida nee mak ami hein tinan barak ona,” nia agradese.
Prezidente Autoridade Munisipiu Ermera, José Martinho dos Santos Soares ho Veteranus Ermera, Ernesto “Dudu” no autoridade sira agradese, husu povu Ermera tomak atu kolabora hodi Governu implementa programa hadia estrada lao ho susesu.
Hafoin sosializasaun, maske udan makaas, PM Xanana, Ministru Samuel, populasaun no autoridade sira dahur hamutuk hodi agradese bá programa Governu hahú tau matan ba problema estrada ne’ebé povu Ermera hein durante tinan barak.
(alb)
