BAUKAU, STLTIMORLESTE.com – Governu promete atu dezenvolve infraestrutura bazika sira iha Munisipiu Baukau, hodi hatuur Baukau nafatin segundu sidade iha Timor Leste.
Liu husi diskursu Vise Primeiru Ministru, Mariano Assanami Sabino agrasede tebes, tanba bele resprezentante Primeiru Ministru Kay Rala Xanana Gusmão hodi lansa fatuk dahuluk ba konstrusaun merkadu Munisipal Baukau nunee husu ema hotu atu kontribui masimu iha prosesu dezenvolvimentu. Husi kantiga sira neebe iha, Munisipiu Baukau sidade diak liu Lorosae nian, nuudar Timor nian sidade daruak hahu kedas iha tempu okupasaun Indonezia.
“Entaun ida iha dever halo nafatin Baukau hanesan sidade. Ermera mos ita fo ona ida nee mak ordem Maun Boot nian ami simu servisu nee ba oin,” Vise Primeiru Ministru Mariano Assanami Sabino hateten liu husi nia diskursu iha serimonia lansamentu fatuk dahuluk ba projetu konstrusaun merkadu Munisipal Baukau neebe realiza iha Vila Nova Baukau, Kinta (12/02/2026).
Iha tinan 2026 Governu implementa ona projetu boot lubuk ida, mak hanesan lansamentu fatuk dahuluk ba konstrusaun merkadu Munisipal iha Munisipiu Ermera no Baukau, maibe iha Governu fo mos projetu seluk hanesan estrada urbana kilometru 23 neebe daudaun lao ona, konstrusaun merkadu Munisipal.
No projetu seluk neebe Governu atu implementa tan iha Munisipiu Baukau mak hanesan Bee Moos nian neebe daudaun iha ona faze preparasaun ba implementasaun no bainhira finaliza sei fo benefisiu ba komunidade Baukau tomak. Aliene projetu seluk tan mak sei halo reabilitasaun ba estrada diresaun husi Postu Administrativu Baguia ba Postu Uatukarabau-Uatulari, Munisipiu Vikeke.
“Merkadu ida nee atu ordena asegura komersiante sira, Baukau tenke orgulhu la kleur tan ita sei atur fatuk dahuluk ba katedral Baukau atu hametin fiar, futuru ita sei dezenvolve Aeroportu Baukau, Baukau hakarak ga lakohi sidade furak ba Timor-Leste iha futuru,” Asssanami promete.
(tom)
