BAUKAU, STLTIMORLESTE.com – Governu proteje ona uma komunidade liu 200 no natar husi risku mota iha Suku Samalari, Postu Administrativu Baukau Vila, Munisipiu Baukau.
Xefe Suku Samalari, Rui Sertório Magno Siqueira esplika, mota Samalari kada tinan sempre akumula bee husi udan been ho volume boot hodi fo impaktu ba uma komunidade no natar balun hetan sobu, maibe Governu liu husi Ministeriu Planeamentu no Investimentu aloka orsamentu hodi selebra kontratu ho kompanhia lokal neebe dadaun konstrui moru protesaun iha mota laran hodi proteje uma no natar husi korenti mota nian.
“Ita nia Governu oras nee halo protesaun ba mota quer dizer fo protesaun ba ita nia komunidade sira nia natar no uma 200 casas neebe afetadu ba mota nee nia presaun,” hateten Rui Sertório Magno Siqueira ba jornalista sira iha Samalari Baukau, Sesta (30/05/2025).
Nia sublina, mota Samalari neebe dadaun Governu kontratu kompanhia lokal konstrui moru protesaun ho distansia pur-volta kilometru 3, neebe hahu husi area Larubi too abrigu Komadante FALINTIL David Alex no Jornalista Max Sthal nia subar fatin.
Projetu konstrusaun moru protesaun refere, Xefe Suku Samalari agradese ba Governu, tanba bele rona Povu nia preokupasaun hodi kontratu kompanhia lokal kontrui dadaun fiziku atinji ona 50%.
“Projetu nee foin implementa iha 2025 quer dizer bele tinan rua ou tolu hotu ona,” Katak Rui Sertório.
Nain ba kompanhia Mauco’o Construction Satornino da Costa Belo hateten, projetu konstrusaun moru protesaun iha mota Samalari hahu iha fulan Fevereiru tinan nee no dadaun atinji ona pursentu 50, tanba projetu refere Governu atribui ba kompanhia ho distasia kilometru 2+306, neebe dadau konstrui ona kilometru 1+100 no restu kontinua ba faze konstrusaun.
“Ami halo tiha ona kilometru ida 100 metrus, sira dehan finaliza tinan tolu, maibe ida nee sei la too tinan tolu,” Katak Satornino da Costa Belo.
Projetu konstrusaun moru protesaun iha mota Samalari, Governu aloka orsamentu hamutuk US$ 3,966,308.35 neebe responsabiliza husi kompanhia joint venture kompostu kompanhia Arquiris Unip.Lda no Mauco’o Construction Lda.
(tom)
