DILI, STLTIMORLESTE.com – Relasiona ho verifikasaun dadus neebe Konselhu Kombatentes Libertasaun Nasional (KKLN) ho Ministeriu Asuntu Kombatente Libertasaun Nasionál (MAKLN) iha tinan 2009, foin dadaun taka sai nee Visi Xefe Estadu Maior Jenerál FALINTIL – Forsa Defeza Timor Leste (F-FDTL), Major Jenerál Calisto dos Santos “Coliati” Governu rekonhese hodi hetan 8a14, tanba nee nia mai halo reklamasaun hodi husu justisa no lia loos, fo rekonhesimentu ida neebe dignu ba ema neebe lo-loos.
Nia dehan, povu barak no ema rihun atus mak fo vida ba rai ida nee atu husu justisa, se ema hotu nonok maubere oan sira atu ba neebe, maubere oan sira nia halerik ba se mak bele rona.
“Tanba nee mak ohin hau mai nee hein justisa no lia los, ho rekonhesimentu ida neebe dignu, nee mak lo-loos, ita labele mai uza oportunidade hodi haree deit ita nia grupu no familia, ita halo funu laiha injustia iha ita nia rain, ita funu atu harii justisa no hetan lia los, lia los mai husi se, husi ulun sira, sei ulun sira mak la loos ona, oinsa ho sira seluk,” hatete Visi Xefe Estadu Maiór Jeneràl F-FDTL, Majór Jeneràl Calisto dos Santos “Coliati” ba jornalista sira iha resintu KKLN Komoro, Kinta (27/02/2025).
Veteranu nee informa, prosesu luta neebe naruk tebes, maibé KKLN ho MAKLN rekonhese deit ba 8a14, sente ida nee la justu ba nia luta neebe durante nia halao iha tempu neeba.
“Hau nia partisipasaun funu husi soldadu lori sana no lori kartus musan, agora hau too mai Jenerál Fitun 2, husi politika hau Visi Sekretariadu Rejiaun 4, no hau iha area operasaun, tanba nee mak nomeia hau ba fronteiras, tanba nee hau iha Frente Armada dala rua, primeiru 1975 too 1979, Segundu 1997 to’o 2000, nee mak ha’u nia partisipasaun iha Frete Armada, kona-ba kadeira nee dala barak husu ba ha’u nia maluk sira,” nia deklara.
Nia informa, fatin ida nee atu mai reklama justisa no lia los, tanba halo funu hodi buka justisa no lia los, maibé funu hotu povu ida nee sei kontinua halerik ba justisa no lia los.
Iha fatin hanesan, Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru” esplika, Ministru la hatudu pozisaun halo desizaun polítika no la sik deit, maibé ema hotu-hotu iha direitu atu halo reklamasaun tanba nee persizu OJE.
“Maibe hotu-hotu halo reklamasaun no konsentrasaun ba dadus indivídu nee, mai tuir lei deit, buat seluk laiha, mais inprinsipiu hau seidauk simu dokumentus hanesan nee,” nia deklara.
Nia dehan, Ministru la hatete katak, Visi Xefe Estadu Maiór Jeneràl FALINTIL – Forsa Defeza Timor Leste (F-FDTL), Majór Jeneràl Calisto dos Santos “Coliati” merese ou la merese, maibe depende ba dadus neebe hakerek iha viza indivídu ema ida-idak ninia, tanba lei mak hatete ida nee.
(jen)
