DILI, STLTIMORLESTE.com – Governu presiza reorganiza diak ba membru komite 12 Novembru 1991, tanba membru balu mate ona, sira nunka valoriza malu.
Dehan Diretor Ezekutivu husi Luta Hamutuk (LH), José Alves da Costa ba STL iha Farol Dili, Kuarta (06/11/2024).
“Importante tebes atu membru Komite 12 Novembru 19991 sira buka malu, oinsa organiza malu ho diak, hanesan juventude loriku asuwain neebe durante hamutuk iha tempu difisil nia laran, hodi kontra desizaun invazor sira nian, too ukun rasik aan,” dehan José.
Tanba tuir nia, loron 12 Novembru 1991 nee loron istoriku ba povu Timoroan hotu, no hafanu mundu nia matan hodi haree, katak Juventude Timoroan hatudu duni nia espiritu ba luta ukun rasik aan nian, tanba nee diak liu buka malu, organiza malu, hanesan uluk hamutuk ho objetivu ida ba libertasaun nasional.
No solidariedade neebe fo ba malu laos limitasaun, katak membru juventude loriku asuwain balun moras ka mate karik, ajuda malu fo kbiit ba malu, nunee bele hetan salvasaun no protesaun diak, maibe durante sentidu ida nee la hatudu iha Estadu Timor Leste, nunee husu atu reorganiza fali Komite 12 Novembru 1991 nee ho organizadu.
“Ita haree rarik durante nee sira buka malu no organiza malu, maibe nia prosesu daudaun nee too ona iha neebe, tanba nee mak husu nafatin ba parte Governu no membru Komite 12 Novembru sira atu reorganiza malu, hodi hametin relasaun domin ba malu, hanesan jerasaun rezistensia ba foun sira atu banati tuir,” dehan nia.
Maibe José dehan, membru komite 12 Novembru barak mak mate ona, barak mos sei moris, maibe iha area rural sira, nunee husu ba Governu liu.husi ministeriu kompetente atu buka hatene membru refere no veteranu sira, hodi organiza sira ho diak, tanba luta ida nee laos mosu derepente deit, maibe juventude, ferik katuas barak mak ofere nia aan hodi sosa liberdade, tanba membru komite 12 Novembru 1991 durante nee Governu rasik seidauk valoriza, tanba nee husu ba parte kompetente sira, liu-liu membru komite sira rasik tenke buka malu, hodi organiza malu nafatin, hanesan jerasaun rezistensia no juventude loriku asuwain Timoroan.
Entretantu antes nee mos Prezidente Autoridade Munisipiu Dili (PAMD), Grigorio Saldanha ‘Mouris’ hateten, asaun juventude loriku aswain iha 12 Novembru 1991 laos deit konsege loke mundu nia matan ba brutalidade militar Indonezia neebe mai okupa Timor Leste, maibe liu ida nee hatudu dignidade husi povu neebe durante tinan naruk nia laran sofre iha kolonializmu nia okos.
Tanba asaun neebe realiza iha 12 Novembru 1991 laos mos asaun espontania husi juventude sira, maibe asaun planeiadu bazeia ba proposta husi Komite Ezekutivu ba Komando Luta, hafoin Sebastião Gomes mate iha 28 Outubru 1991.
(EST 1)
