DILI, STLTIMORLESTE.com – Governu respeita atividade negosiu komunidade sira nian, maibe iha fatin neebe bandu ona labele, presiza obedese ba regras.
“Ita respeita atividade komersiu komunidade sira nian, maibe labele halo atividade sira nee iha fatin neebe bandu ka fatin neebe mak espasu publiku, sa tan fatin neebe halo ona atuasaun katak labele faan, maibe kontinua faan, ida nee susar”, katak Visi Ministru Asuntu Parlamentar, Adérito Hugo ba jornalista sira iha Palasiu Governu, Kinta (24/10/2024).
Membru Governu nee husu autoridade sira neebe komprende regras, atu esplika hela ba komunidade sira neebe halao atividade komersiu sira iha fatin neebe bandu, atu sira bele obedese ba regras.
“Ita iha regras, neebe fatin publiku neebe mak bandu atu labele halao atividade negosiu nee labele, maibe sira ita nafatin ba halao nee susar”, nia tenik.
Tanba tuir nia Ministériu Administrasaun Estatal (MAE) no Sekretariu Estadu Asuntu Toponímia Urbanizasaun (SEATOU), bainhira fatin neebe antes nee kontrola ona atu labele halo atividade negosiu sira, nee tenke iha ona seguransa nunee haree ida rua ba halo negosiu, komesa alerta kedas ona, nunee labele mosu konsentrasaun barak, tanba bainhira iha konsentrasaun barak ona, mak ba halo atuasaun hanesan horsehik nee mak mosu dezentendimentu.
SEATOU ho ekipa jestaun merkadu, atu kontinua halo kontrolu, rutina, nunee komunidade sira haree katak fatin neebe bandu nee bandu duni, neebe prezensa tenke kontinua too komunidade sira komprende.
Tanba mosu dezentendimentu nee tanba laiha prezensa husi autoridade, tanba née husu nafatin ba autoridade sira atu nafatin hatudu prezensa iha fatin bandidos sira hodi kontinua alerta, nunee komunidade sira bele komprende, Laos ohin atua, depois husik mamuk, ikus mai komunidade sira barak ba halao fali atividade nee, mak akontese hanesan horklan.
Entretantu tuir vídeo no imajen, neebe STL asesu bainhira espalha iha media sosial, haree katak, komunidade sira barak halo atividade negosiu, iha area Kampu Baru, no ekipa jestaun merkadu halo atuasaun hodi hadau sira nia modo no sasan seluk neebe faan, hamosu negosiantes sira nia emosaun hodi baku malu ho ekipa jestaun merkadu, maibe iha dezentendimentu nee hetan normaliza hikas husi PNTL neebe akompanha mos ekipa sira ba halo atuasaun.
(gui)
