DILI, STLTIMORLESTE.com – Sekretariu Estadu Terras Propriedade (SETP), Jaime Javier Lopes hatete, Governu tau ona osan ba iha tinan 2025, no iha fulan Novembru nia laran sei atribui tan sertifikasaun ba rai.
“Iha planu Terras Propriedade Governu tau ona osan 2025 iha quinhentos vinte mil, atu fo sertifikasaun ba rai,” dehan Sekretariu Estadu Terras Propriedade (SETP), Jaime ba jornalistas sira iha Kaikoli, Dili, Tersa nee (29/10/2024).
Nia hatutan, hanoin hela objetivu ikus atu fo ba komunidade sira mak fo titulu rai ba komunidade sira, atu garante ema nia direitu iha rai pedasuk ida nia leten, hodi sira bele halo levantamentu ba iha Banku, foti osan ruma hodi halo negosiu ida nee iha ona planu.
Tanba fo ona titulu rai ba komunidade balu, no iha fulan Novembru nia laran sei fo tan no 100 ital ba estadu, tanba atu halo kontratu arendamentu ruma ho kompanhia ka ema ruma ka sosiedade sivil, sira mos tauk hela rai nia estatutu nee oinsa.
Maski rai nee estadu nian tenke fo ona titulu ba rai katak, rai nee estadu nian, atu investor sira mai husi rai liur sira garante katak, iha sertifikadu katak rai nee estadu nian, sira la tauk atu halo investimentu.
Iha buat balu neebe presiza halo, maibe tuir planu Governu nian tinan 2025 tau mos orsamentu boot hodi haree ba ida nee, tanba iha tinan 2014 mai too iha tinan 2019 sistema Nasional Kadastru lao tiha ona. Atu fo sertifikadu ba ema haree ba sira neebe la iha disputa, iha ona publikasaun mapa loron 90, la iha reklamasaun husi ema ruma, ida nee mak tekniku sira re indentifika fali, se tuir duni dadus neebe iha, sira sei lori fali mai hodi fo sertifikadu.
Iha fatin ketak, Komunidade Suku Komoro, Domingos Dos Santos dehan, importante duni fahe sertifikadu nain ba rai, tanba durante nee ema balu hela kleur ona maibe seidauk hetan sertifikadu nain ba rai.
“Importante atu ema ida hetan sertifikadu nain ba rai, tanba durante nee ba rejistu hela deit iha Kadastru, maibe seidauk hetan sertifikadu ruma,” dehan nia.
(ter)
