DILI, STLTIMORLESTE.com – Governu liu husi Sekretariu Estadu Terras Propriedade (SETP) iha planu atu haruka funsionariu sira tun ba foti dadus, ba komunidade sira neebe okupa uma perumahan neebe Indonezia husik hela.
Sekretariu Estadu Terras Propriedade (SETP), Jaime Javier Lopes hatete, nia parte propoin hela 122 funsionariu atu bele tama tan, haree ba kapasidade funsionariu menus tebes, tanba nee mak presiza atu rekruta tan hodi suporta atividade neebe atu halo.
Fo Ezemplu, iha Perunas Bairo Pite, barak mak uma sidadaun Indonezia nian, agora daudaun sira halo hela, ida nee planu atu tun ba foti dadus hodi halo kontratu arendamentu fila fali ba sasan sira neebe abandonadu nee.
“Maibe Ministru foti tiha hau nia delegasaun kompetensia neebe hau iha antes Ministru Amandio delega ba hau, nia foti iha 27 fulan Maiu 2024 nee, nia promete katak iha tempu badak fo mai hau ate a data seidauk fo,” dehan Jaime ba jornalista sira iha Kaikoli, Dili, Tersa nee (29/10/2024).
Nia hatutan, tama ba fulan hira ona nia kompetensia atu halo buat sira nee la iha, tanba nee mak paradu. No kontratu arendamentu barak mak haruka hela ba iha Ministeriu Justisa, atu Ministru organiza buat nee ho lais, tanba reseitas barak tama nee husi kontratu arendamentu.
Nia parte bele koalia maibe labele halo buat ida, tanba la iha kompetensia, no Ministru promete hela iha tempu badak atu fo kompetensia nee, realidade la fo ida no servisu barak pendente no la lao tanba ida nee, kompetensia la iha.
“Ida nee iha implikasaun ba reseitas neebe mai husi arendamentu nee, no renovasaun kontratu no kontratu foun la lao, sai problema boot ida ba Estadu Timor Leste liu-liu Governu,” hatete governante nee.
Nia dehan, dokumentu neebe haruka ba Ministeriu Justisa (MJ) la iha ida mak rezolve hodi halo kontratu, nia la hatene ida nee politika oinsa, no Ministru hanesan foun ba iha Ministru Justisa, uluk hanesan Defensor Publiku, depois hanesan Komisariu KAK, no ikus sai hanesan Ministru la hatene ida nee buat foun, atu foti desizaun ruma sei hanoin nia parte la hatene.
Iha fatin ketak, Akdemiku Rafael de Jesus dehan, Ministru hanesan superior, tenke iha kordenasaun ho parte hotu, atu bele halao servisu ho diak.
“Ministru hanesan Superior iha Ministeriu ida tenke iha Koperasaun ho parte hotu, atu tulun sira halao servisu tuir planu neebe iha,” dehan nia.
(ter)
