DILI, STLTIMORLESTE.com – Visi Primeiru Ministru no Ministru Koordenador ba Asuntu Sosial, Mariano Assanami Sabino hatete, tinan 2025 Governu sei konsentra masimu ba sentru kardiaku iha Lahane.
“Iha tinan 2025 Governu sei konsentra masimu ba uma kardiaku Lahane, tanba iha 2024 kontrusaun ba sentru kardiaku Lahane ita halo ona no ita esforsu atu kontinua halo tinan oin, nunee ita bele utiliza hodi fo atendimentu,” hatete Assanami ba jornalista sira iha PN, Dili, Kuarta (13/11/2024).
Governante nee dehan, durante nee Primeiru Ministru orienta ona atu halo koordenasaun ho Ministeriu Saude (MS) hodi haree didiak no prepara didiak sentru nee mak dahuluk konstrusaun halo ona, daruak prepara fasilidade no datoluk jestaun ba rekursu umanu sira.
Maibe ba aimoruk sei halo dijitalizasaun nunee mak hotu tenke kumpri regras, depois hadia mos estandarizasaun padraun ba klinika sira, maibe sei lao fazeadamente no buat balu neebe mak iha ona bele reforsa liu tan.
Iha fatin ketak, Diretora Jeral Ministeriu Saude (MS), Terlinda Barros informa, Sentru Kardiaku Lahane nee importante tebes, tanba nee uma iha ona maibe ekipamentu seidauk iha, tanba nee governu tau ona osan milhaun US$1 resin.
“Tinan 2025 Governu sei tau osan ba sentru kardiaku Lahane hamutuk milhaun US$ 3, maibe balun re-aloka ba atividdae seluk, entaun Governu tau milhun US$1 resin, maibe ita hein katak orsamentu nee aprova ona ita bele koalia sai no saida mak ita presiza,” nia afirma.
(jen)
