BAUKAU, STLTIMORLESTE.com – Governu liu husi Ministeriu Agrikultura Pekuaria Peskas no Florestal (MAPPF) tempu besik sei lansa fatuk dahuluk ba konstrusaun irigasaun Uatuwa, iha Postu Administrativu Baukau Vila, Munisipiu Baukau.
Ministru Marcos da Cruz informa, prosesu kontratu kompanhia ba konstrusaun irigasaun Uatuwa remata ona iha fulan hirak liu ba, tanba nee molok implementa projetu refere hamutuk ho Autoridade Munisipiu Baukau, Autoridade Postu Baukau Vila inklui Autoridade Suku Samalari halo observasaun direira ba fatin konstrusaun nian neebe dadaun prepara ona.
“Ita planu atu halo lansamentu sermonia fatuk dahuluk ba projetu ida nee iha loron 16 Agosto fulan ida nee, tanba nee hau mai iha nee ho Autoridade Munisipiu Baukau, APA sira haree tuir prosesu sira nee prepara ona atu halo seremonia nee,” hateten Ministru Marcos ba jornalista sira iha Samalari Baukau, Kuarta (06/08/2025).
Governante nee sublina, fatin ba konstrusaun irigasaun Uatuwa preparadu no hein atu prepara tan konsdisaun balun hanesan seremonia kultural hodi hakat ba faze lansamentu fatuk dahuluk iha loron 16 Agosto nee.
Nia konfesa, orsamentu ba kontrusaun irigasaun Uatuwa husi Orsamentu Jeral Estadu 2025 hamutuk Milhoens US$ 22 no kompanhia implementador mak C.N.I 22 ho durasaun servisu tinan 3 neebe bainhira konstrusaun refere termina sei fo vantajen ba natar barak asesu bee.
“Area nee sei kobre tuun too tasi Seisal, Samalari, Kasameta neebe Natar sira tun ba kraik nee sei kona hotu nia sei kobre 2 mil hektares. Neebe irigasaun nee sei loke hotu fali area sira neebe durante nee abandona,” Ministru Marcos akresenta.
Representante Prezidente Autoridade Munisipiu Baukau, atual Diretor Ajensia Planeamentu Francisco Xavier Guterres hateten, preparasaun Autoridade Munisipiu Baukau nian ba preparasaun lansamentu fatuk dahuluk sei kordena ho Autoridade Postu, Suku inkkui lia nain sira nunee bele identifika fatin ofisial hodi lansa fatuk dahuluk tuir loron neebe determina ona husi Ministeriu.
Autoridade Munisipiu Baukau mos sei ajuda Ministeriu hodi koordena ho komunidade natar nain afetadu sira, nunee bele kontribui prosesu konstrusaun irigasaun refere termina tuir kontratu neebe kompanhia ho Governu selebra ona.
(tom)
