DILI, STLTIMORLESTE.com – IX Governu Konstitusional sei realiza kompetisaun Dili International Marathon iha fulan Outubru tinan nee.
Lia hirak nee hatoo husi Ministru Juventude Desportu Arte no Kultura (MJDAK), Nelio Isaac Sarmento ba jornalista sira bainhira remata halo enkontru ho Prezidente Republika Jose Ramos Horta iha Palasiu Prezidensial Nikolao Lobato, Bairo Pite, Tersa (08/07/2025).
Ministru hatete, iha fulan Outubru sei realiza kompetisaun Dili International Marathon ho Tema “Dili International Marathon 2025 Run For Palestine”.
“Iha fulan Outubru tinan ida nee sei realiza kompetisaun Dili International Marathon ninia partisipasaun nee husi nasaun sira ASEAN nia inklui ho internasional sira neebe hela iha Dili, tantu ho mos ita nia atleta nasional sira sei partisipa iha Dili International Marathon inklui ita boot sira mos bele partisipa halai hotu ba,” dehan Ministru.
Ministru dehan, taknikamente ekipa kompostu husi Palasiu Prezidente, Ministru Desportu, no atletizmu no sei elabora kriteria hotu depois anunsia ofisial iha tempu besik, atu nunee ema bele halo rejistrasaun hodi partisipa masimu liu tan iha Dili International Marathon.
Aleinde nee Ministru mos relata ba Prezidente kona-ba preparasaun Jogu Desportu CPLP no felizmete nia abertura halo iha 19 Julhu no abertura husi Prezidente, maibe Prezidente sei partisipa simeira CPLP iha Guine Bisau, tanba nee abertura la partisipa no sei partisipa iha serimonia enseramentu.
“Hau informa ona ba ita boot sira no Prezidente mos akompanha ida nee ita nia partisipasaun hau bele dehan masimu ona, ita hein deit hari H iha dia 19 Julhu sei hahu iha oras tuku 4 loraik, ita sei hahu halo serimonia no taka iha tuku 10 kalan, tanba ita sei asiste jogu entre Timor Leste ho Portugal,” katak Ministru.
Nunee mos Visi Primeiru Ministru no Ministru Koordenador Assuntu Ekonomiku no Ministru Turizmu no Ambiente, Fransico Kalbuady Lay hatutan, haksolok tebes mai hasoru malu ho Prezidente Republika Jose Ramos Horta hodi diskute hamutuk kona-ba atividade neebe sei halao iha rai laran liga ho desportu nia.
“Ksolok no privilejiu boot ohin dadarsan ita boot sira hatene katak enkontru ida neebe mak konvoka husi Prezidente Republika rasik liu husi Xefe Kaza Sivil konvida atan hau hanesan laos Visi Primeiru Ministru maibe hanesan Ministru Turizmu no Ambiente hamutuk ho Ministru Desportu no Kultura, ho Prezidente Siklizmu no Prezidente Federasaun Atletizmu, saida mak ami diskute iha dadersan nee, uluk nanain hanesan ita boot sira hatene katak Prezidente Republika Jose Ramos Horta hahu husi nia mandatu primeiru iha 2017 aleinde halo servisu estadu nia, Prezidente mos inisiativa lubuk ida liu-liu parte desportu no kultura festival kultural sira,” dehan Visi PM Kalbuady Lay.
Visi PM dehan, mai diskute hamutuk iha ona desizaun balun iha tempu kurtu sei halao nafatin liu-liu mak Dili Maratona Internasional nia.
Visi dehan, tema Dili International Marathon 2025 nee mai husi Prezidente Republika Jose Ramos Horta mak Run For Palestine.
Dili Marathon ida nee ho nia tema foun, ita hatene hotu tema foun neste momentu geopoliitika neebe iha mundu akontese neebe ho titlu ida mai duni husi nain Prezidente, hau hanoin briliante tebes Titlu naran Run For Palestine.
Nia dehan, tema Dili International Marathon 2025 Run For Palestine mak halai ho solidariedade ida nee hanesan mundu tomak fo, ida nee atividade primeiru neebe sei lao no segundu mak iha tinan ida nee realiza nafatin festival Rabilau.
Nunee mos Afranio Xavier Amaral Prezidente Fererasaun Atletizmu hatete, Federasaun Atletizmu iha protidaun tomak apoiu tekniku iha Desportu Dili International Marathon neebe sei realiza iha fulan Outubru.
“Federasaun Atletizmu iha protidaun atu apoiu iha parte tekniku hanesan ita nia ministru mensiona katak Dili Marathon ida nee aumenta tan palavra hira iha neeba Run For Palestine naran ida nee privilejiu oituan nunee redasaun atletizmu sei prepara iha parte tekniku nunee eventu nee bele lao ho diak no partisipasaun masimu husi partisipante sira, liu-liu iha ASEAN, atleta ho atleta no atleta nasional sira ita nia sosiedade Timoroan rasik tanba ita mak sai uma nain,” katak nia.
Nia hatete, Timor Leste mak sai uma nain ba Jogu Dili Marathon, espera katak apoiu husi Palasiu Prezidente, Ministru Turizmu, Ministru Juventude no Desportu bele garante katak parte tekniku sei lao ho susesu ho diak.
(eme)
