DILI, STLTIMORLESTE.com – Governu liu husi Ministeriu Saude (MS) seidauk selu hotu dividas husi Ospital Singapura, Malazia no Indonezia, tanba fatura “tagihan” seidauk mai iha Ministeriu Saude (MS) tanba pasiente balun sei baixa hela iha neeba.
“Ita sei halao hela, balun ita hanoin atu selu, maibe ita halo pagamentu, ita sei hein fatura, tanba pasiente balun sei hela iha neeba,” hatete Ministra Saude (MS), Élia A. A. dos Reis ba jornalista sira iha Salaun CNE Dili, Tersa (06/05/2025).
Nia dehan, pasiente balun sei halao tratamentu iha Ospital Malazia, Singapura nomos Indonezia, tanba nee seidauk bele selu hotu dividas hirak nee.
“Sei ita nia pasiente sira nee alta ona, entaun fatura foin mai, depois ami informa hela ba ita boot sira, tanba prosesu sei lao hela,” nia esplika.
Iha fatin hanesan Visi Primeiru Ministru no Ministru Koordenadór ba Asuntu Sosiál, Mariano Assanami Sabino informa, prosesu pagamentu ba dividas neebe Governu sei deve Ospital Singapura, Malazia no Indonezia agora daudaun Ministeriu Saude (MS) selu 80% ona, no pasiente sei kontinua baixa iha ospital sira nee.
“Agora prosesu nee lao hela, kauze tama ona 70% too 80% ita selu hela, no ita fasilita nafatin pasiente ba liur,” nia deklara.
Nia afirma, pasiente sira sei nafatin ba halo tratamentu iha saude, maibe pasiente neebe bele halo tratamentu iha Timor bele sei kontinua iha HNGV.
“Sei nafatin ba halo tratamentu iha neeba, maibe ida neebe mak bele halo tratamentu nee bele, importante mak pasiente tenke salva, ida nee mak ita halo, pasiente balun sae aviaun labele, entaun permeiru ita halo salvasaun iha nee tenke lao, liu-liu sira neebe iha tensaun aas, depois kurasaun no ulun kotuk nee nakfera, nee susar para sae aviaun, tanba nee ita sei buka dalan hotu-hotu para iha nee tratamentu depois ba,” nia afirma.
(jen)
