BAUKAU, STLTIMORLESTE.com – Prezidente Komisaun Organizadora ba selebrasaun loron nasional juventude ba dala 20 no komemorasaun masakre santa kruz ba dala 34 iha Postu Administrativu Baukau Vila, konsidera Governu seidauk tau importansia ba selebrasaun loron 12 Novembru.
Prezidente Komisaun Organizadora Selebrasaun 12 Novembru iha Postu Administrativu Baukau Vila, Manuel Camilo Pires hateten, selebrasaun loron 12 Novembru tinan nee Ministeriu Juventude Desportu Arte no Kultura (MJDAK) aloka orsamentu liu husi Sentru Juventude Munisipiu Baukau (CJMB) ba komisaun organizadora ba selebrasaun loron nasional juventude ba dala 20 no komemorasaun masakre santa kruz ba dala 34 iha Postu Baukau Vila ho montante US$ 600 hodi realiza atividade neebe trasa ona iha selebrasaun loron refere.
Maibe estimasaun ba orsamentu neebe MJDAK liu husi CJMB aloka la sufisiente, tanba Postu Baukau Vila implementa atividade barak, nunee parte komisaun organizadora ba selebrasaun refere involve kamadas juventude hotu junta ideias diriji proposta ba Autoridade sira inklui emprezariu Baukau oan sira hodi husu kontribusaun orsamentu no daudaun orsamentu hamutuk US$ 6.300.
“Nuudar juventude sente triste, tanba loron nee importante konta istoria indepedensia juventude nia terus iha momentu 1991 nian, liu husi 1991 mak hatudu ba mundu katak Timor hakarak indepedensia, iha nee mak ema hatene, tanba joven mak futuru ba nasaun, maibe atividade joven nian sira nunka mais tau importansia,” Manuel hateten ba jornalista sira iha salaun apuramentu Vila Nova Baukau, Tersa (11/11/2025).
Nia sublina, atividade neebe Komisaun Organizador ba selebrasaun refere iha Postu Baukau Vila trasa mak hanesan limpeza jeral no seminariu involvimentu estudante sira husi eskola sekundaria sira neebe realiza iha loron 11 Novembru no loron 12 Novembru parte dader hahu ho misa agradesimentu ba eroi no eroina sira hafoin marsa lori aifuan no lilin ba semiteriu publiku Tirilolo.
No atividade seluk tan mak hanesan halo reflesaun, loke filmajen trajedia masakre santa kruz no sei iha palku muzika neebe anima komunidade Baukau Vila, nunee ho atividade hirak nee sai razaun ba komisaun organizadora husu kontribuisaun.
“Ami husu kontribuisaun tanba ita hakarak komemora loron nee involvimentu ema hotu-hotu, labele ita nee deit, entaun orsamentu nee la sufisiente, nunee ami uza kapasidade husu apoiu,” Manuel argumentu
Nia konsidera, loron 12 Novembru importante ba joven sira atu selebra, tanba iha loron refere mak joven barak sakrifika aan hodi hatudu ba mundu katak Timor hakarak indepedensia, maibe hafoin Timor hetan nia indepedensia, realidade lederansa barak interese ba partidu hodi haluhan no la tau importansia ba loron juventude.
Entretantu banda muzika neebe komisaun organizadora ba selebrasaun loron nasional juventude ba dala 20 no komemorasaun masakre santa kruz ba dala 34 iha Postu Administrativu Baukau Vila rejistu hamutuk 5 neebe sei anima komunidade sira iha loron 12 Novembru kalan.
Jornalista: Tomas Reis
Editor: Xisto Mendonça
