DILI, STLTIMORLESTE.com -.Visi Primeiru Ministru, Ministru Koordenadór ba Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino hatete, Governu selu ona dividas hamutuk milhaun US$ 9 too US$ 12 ba nasaun tolu.
“Kuaze milhaun US$ 9 too US$ 12 neebe mak ita selu tiha, agora sei identika hela ida neebe mak seidauk,” hatete Visi MDRHK, Mariano Assanami ba STL iha Hotel Hilton Fatuhada, Dili, Tersa (25/02/2025).
Nia dehan, Governu liu Ministeriu Saude (MS) sei identifika hela hospital neebe mak seidauk selu, tanba pasiente husi Timor ba ona halo tratamentu iha rai liur.
“Tanba nee mak dala ruma ita dehan gratuita, maibe laos gratuita, Governu mak selu ba ninia povu nee mak ita bolu gratuita, tanba nee Governu nia responsabilidade nafatin oreinta ba Ministra ho nia Visi nain rua para atu haree didiak hodi ita bele selu dividas neebe ita iha,” nia esplika.
Nia informa, Governu iha planu ona, ba futuru mak iha moras sira hanesan kurasaun, kankru, rins, bele halo tratamentu mos iha rai laran.
Iha fatin ketak, Visi Ministru Fortalesimentu Institusional Saude, Jose Mango dos Reis esplika, Govenu liu husi Ministeriu Saude selu ona devidas iha nasaun Malazia, Indonezia no Singapura hamutuk milhaun US$9, no tinan nee Governu aloka tan milhaun US$ 8 hodi selu.
Governante rekonhese, los duni dividas husi nasaun Malázia, Indonezia no Singapura seidauk selu hotu, maibe agora orsamentu iha ona atu selu dividas sira nee.
“Dividas oituan neebe mak ita seidauk bele selu, maibe agora orsamentu iha hela no ita tenke haree didiak invoice neebe mak loron-loron sira halo tratamemtu ba ita nia pasiente hatama mai nee laos oituan,” nia informa.
(jen)
