DILI, STLTIMORLESTE.com – Empreza Keshavarz Great Timor Lda lamenta ho Ministeriu Agrikultura Pekuaria Peska no Floresta (MAPPF) neebe la autoriza atu loke investimentu rua iha Loes no Maubara, maske antes nee hetan ona sertifikasaun husi VIII Governu Konstitusional.
Nain ba empreza Keshavarz Great Timor Lda, Ayub Karimi katak, investimentu neebe empreza Keshavarz Great Timor Lda nuudar empreza neebe halo nia investimentu dezde 2020 iha area Pekuaria hanesan hakiak ikan, hakiak manu hodi faan fali nia tolun no produsaun karau susu been iha Hera Postu Administrativu Cristo Rei, Munisipiu Dili no iha Postu Administrativu Maubara rasik, no ida tan iha Loes. Investimentu hirak nee empreza preve osan milhaun US$ 1.5.
Tuir nia, investimentu neebe nia halo nee ho baze legal, tanba hetan sertifikasaun husi Servisu Rejistu Verifikasaun Emprezarial (SERVE) no Ministeriu Justisa.
“Hau nia investimentu nee hahu lao iha 2020, tanba hau hetan ona lisensa husi Governu. Maibe iha 2023 Governu liu husi Ministeriu Agrikultura Peskas Pekuaria no Floresta deside la autoriza ami kontinua halo ami nia atividade ka investimentu iha Maubara no Loes, tanba konsidera fatin nee nuudar fatin ba industria peska area protejida,” dehan Empreza Keshavarz Great Timor Lda, Ayub Kirimi ba jornalista Sira iha nia knaar Fatin Kuluhun, Sabadu (16/11/2024).
Nia hatutan, ho impedimentu neebe mak nia hasoru mak nia husu ba Primeiru Ministru Xanana Gusmão atu atribui fali rai nee ba Keshavarz Great hodi kontinua halo investimentu.
Nia akresenta, rai neebe iha area Maubara no Loes nee atribui husi Antigu Ministru Justisa Tiago Sarmento ho despaixu numeru 04240 neebe Ministeriu Justisa atribui hodi autoriza empreza Keshavarz Great Timor Lda atu halo arredamentu hodi halo sira nia investimentu.
“Agora ami nia atividade iha Maubara no Loes paradu, tanba Governu la autoriza rai nee hodi ami kontinua halo ami nia atividade. Ami triste tanba investimentu ajuda ekonomia Timor Leste. Hau ho haraik aan ba Primeiru Ministru Xanana Gusmão atu solusiona ami nia problema nee hodi ami bele kontinua ami nia investimentu ida nee”, nia afirma.
Nia dehan, ho investimentu neebe nia halo nee fo ona oportunidade ba Timoroan nain 85.
(alb)
