DILI, STLTIMORLESTE.com – Governu halo desizaun taka kursu neebe mak hanesan iha Instituisaun Ensinu Superior, tantu publiku no privadu iha Timor Leste (TL).
“Primeiru atu hatete deit katak, Governu halo desizaun atu taka kursu sira neebe hanesan, tanba ita boot sira hatene katak, avaliasaun ANAAA sei hatudu hela katak, ita iha hela pur volta de 70% iha hela nivel sufisiente kursu, peskiza INCT nia mos halo, ida kona-ba siensia iha TL, nee mos hatudu katak, 70%, kursu sira neebe eziste iha ita nian ensinu superior sira, tantu publiku no pribadu nee, sosial mak barak liu,” dehan Ministru Ensinu Superior Siensia no Kultural (MESSK), Jose Honorio da Costa Pereira Jeronimo ba jornalista sira,
iha salaun INCT, Balide, Kinta nee (10/04/2025).
Nia hatutan, tanba kada universidade loke kursu neebe hanesan, tanba nee mak Governu haree katak, ida nee labele, tanba sira tenke hadia duni, kursu sira neebe eziste iha sira nian Institutu ka Universidade ho diak, para bele elava kualidade, ninia nível nee laos iha sufisiente, tanba nee kada universidade loke kursu neebe hanesan, tanba Governu haree katak ida nee labele tan ona kontinua.
“Sira tenke hadia duni kursu sira neebe eziste, hakarak ka lakohi ita tenke aposta ba kualidade. Hau fo ezemplu UCT iha parteira, labele instituisaun ida mai hakarak loke tan parteira, ezemplu IPB iha ekonomia no jestaun, depois Institutu ka Universidade ida seluk hakarak loke tan ekonomia no jestaun, nee ita la fo, tanba ho kursu neebe hanesan, nee ita labele fo ona atu loke, tanba saida, ita loke kursu neebe hanesan gradua joven barak, maibe kampu servisu laiha, maibe kursu neebe agora eziste hela nee kontinua lao nafatin, no foun mai mak labele ona, tuan lao nafatin,” katak nia.
Area sira neebe afeta ba suspensaun nee inklui kursu Direitu ka Siensia Direitu, Jestaun, Kontabilidade, Jestaun Finanseira, Jestaun Publika, Enjenaria Sivil, Enjenaria Informatika, Konstrusaun Sivíl, Saude Publika, Enfermajen, Parteira, Administrasaun Publika, Siensia Politika no Relasaun Internasional.
Iha fatin hanesan, Prezidente IPB, Acacio Cardoso Amaral hatete, ho rezolusaun nee ba oin sira sei la loke tan kursu konstrusaun sivil, maibe sira iha hanoin ba oin atu loke tan kursu saude animal.
“Ami agora daudaun iha IPB nee kursu rua, kursu produsaun animal nomos ami iha kursu konstrusaun sivil neebe hamahan Aan iha eskola superior enjenaria, ami ba oin loke tan kursu konstrusaun sivil, hau hanoin lae,” dehan nia.
(jac)
