DILI, STLTIMORLESTE.com – Reprezentante povu iha uma fukun Parlamentu Nasional (PN) husu ba Governu tenke tau importansia ba Laboratoriu Hospital Nasional Guido Valadares (HNGV), tanba presiza tan reazente no rekursu umanus, atu nunee bele reforsa servisu iha HNGV.
Haktuir Deputada Bankada FRETILIN, Nurima Ribeiro Alkatiri ba STL iha HNGV, Kinta (23/1/2025).
“Iha laboratoriu ami mos haree katak, presiza tan reazente, presiza tan ekipamentus no mos rekursu umanu balu para atu reforsa. Sira konsege harii mos sentru orkologia neebe ita bele hatete, foun iha hospital dezde tinan kotuk, ami husi opozisaun mos levanta posibiildade atu kria sentru espesialzadu ba orkologia, no kardologia, ami haree katak transferensia pasiente barak liu ba rai liur relasiona ho moras rua nee,” hatete Deputada Bankada FRETILIN nee.
Nia esplika, Komisaun F konsege haree Sentru Orkologia neebe foin harii iha 2023, maibe daudaun nee sira konsege halo ona servisu balu.
“Daudaun nee sira konsege halo ona servisu balu, ohin tuir informasaun balu husi doutor espesialista katak, sira komesa ona halo kemotrapia balu, maibe sira presiza mos ekipamentus barak atu bele sai efisiente liu tan, haree ba laboratoriu nasional neebe mak presiza ekipamentus, reazente no kondisaun. Se ita hakarak sira atu servisu ho kualidade liu tan, ita tenke investe liu-liu govenu tenke investe orsamental,” nia tenik.
Nia hatutan, tenke fo rekursus umanu ho ekipamentus para garante katak, servisu nee lao ho diak. Labele deit izije husi instituisaun sira sem halo investimentu lo-loos ba area sira nee.
Iha fatin ketak, Akademista UNPAZ, Fakuldade Saúde Publiku, Novita Dewi Vilanova esplika, wainhira HNGV ninia atendimentu diak, nee presiza laboratoriu neebe iha kualidade, rekursu umanu tenke sufisiente no ekipamentus, tanba nee Parlamentu Nasional koloka orsamentu tenke ho montante boot.
(jen)
