DILI, STLTIMORLESTE.com – Parlamentu Nasional (PN) liu husi Bankada FRETILIN husu ba governu atu harii edifisiu sira, tenke garante asesibilidade ba Ema ho Defisiensia sira.
Deputada Bankada FRETILIN, Nurima Ribeiro Alkatiri katak, iha tinan foun ida nee hanesan oportunidade ida atu haree fila.fali objetivu estadu nia oinsa kria asesibilidade ba Ema ho Defisiensia, tanba sira mos iha direitu hanesan ho ema seluk atu asesu ba espasu publiku sira.
“Hau hakarak bolu atensaun ba kestaun fundamental ida neebe, infelizmente, dala barak nafatin neglijensia, nesesidade atu garante direitu sira no asesibilidade ba Ema ho Defisiensia,” hatete Deputada, Nurima Ribeiro Alkatiri liu husi plenaria PN, Tersa (14/01/2025).
Deputada nee hatutan, tuir dadus husi Organizasaun Mundial Saude (OMS) nian besik 15% husi populasaun mundial moris ho tipu defisiensia. No iha Timor Leste, numeru sira nee bele aas liu tan, tanba limitasaun infraestrutura no servisu limitadu espesialista sira neebe disponivel. Ida nee afeta direitamente ba ema sira nee nia direitu atu partisipa tomak iha sosiedade, nuudar sidadaun ho direitu hanesan.
“Ho razaun ida nee, hau hakarak bolu ita hotu-hotu nia atensaun, inklui Governu, atu fo prioridade ba dezenvolvimentu no fornesimentu infraestrutura no servisu sira neebe permite asesu asesivel ba ita nia sidadaun sira neebe moris ho defisiensia. Esensial katak infraestrutura publika sira hanesan eskola, hospital, edifisiu sira governu no transporte, dezena no adapta atu sai inkluzivu,” tenik nia.
Nia akresenta, fatin sira neebe governu presiza tau atensaun hodi bele garante asesibilidade mak hanesan rampa asesu nian, hariis fatin adaptadu, sina tatil sira ba ema ho defisiensia sira komunikasaun vizual no alternativu ba ema tilun-diuk sira laos buat luxu sira. Sira mak direitu sira prinsipiu baziku sira neebe garante husi konvensaun internasional sira, hanesan konvensaun kona-ba direitu ba Ema ho Defisiensia neebe Timor Leste ratifika ona.
(alb)
