DILI, STLTIMORLESTE.com – Governu Timor Leste (TL) liu husi Ministeriu Dezenvolvimentu Rural no Habitasaun Komunitaria (MDRHK) hamutuk ho Asian Development Bank (ADB), dezenvolve no hadia reziliensia rural no vida moris iha TL.
“Ita agradese ba ADB, Embaixada Japaun no doadores internasional sira seluk, sempre fo apoiu ba Estadu Timor Leste hodi halo dezenvolvimentu, liu-liu halo infraestrutura irigasaun lubuk ida iha rai laran iha area Manatutu nian,” dehan Visi Primeiru Ministru, Ministru Koordenador Asuntu Sosiais, Ministru Dezenvolvimentu Rural no Habitasaun Komunitaria (VPM, MKAS, MDRH), Mariano Assanami Sabino liu husi nia diskursu iha Ministeriu Finansas (MF) Dili, Kuarta (18/12/2024).
Nia dehan, apoiu neebe mak organiza husi ADB hamutuk ho doadores sira, ohin halo akordu imediatu iha Ministeriu Finansas (MF), ho objetivu atu haree ba projetu hadia reziliensia rural no vida moris iha Timor Leste.
Tanba nee, husi apoiu orsamentu neebe doadores sira fo ba Estadu Timor Leste ho montante milhaun US$ 16.5, ho objetivu atu halo projetu no hadia ba reziliensia rural no vida moris nian iha rai laran.
Iha sorin seluk, Ministra Finansas (MF), Santina Cardoso hatete, Governu Timor Leste liu husi Ministeriu Dezenvolvimentu Rural no Habitasaun Komunitaria (MDRHK) ho ADB no parseiru internasional sira fo apoiu ho orsamentu montante milhaun US$ 16.5, uza ba projetu liu-liu hadia reziliensia rural no vida moris nian.
Tanba orsamentu sira nee ho objetivu atu hadia ba reziliensia rural no vida moris, liu-liu haree ba setor agrikultura nian, no hadia mos ba kondisaun balun neebe presiza hadia, nunee ADB hamutuk ho Governu Timor Leste atu halo esforsu, nunee bele halo dezenvolvimentu diak iha rai laran.
Entretantu County Director ADB, Estefania Dina hatete, apoiu neebe ADB ho doadores internasional sira fo ba Estadu Timor Leste laos foin ohin, maibe beibeik ona, nee hatudu katak konfiansa ba Estadu Timor Leste nee masimu, nunee kontinua fo apoiu, liu-liu dezenvolve no hadia reziliensia rural no vida moris iha Timor Leste.
Tanba nee, ADB fiar katak programa nee bele lao ho diak, no bele projeta no hadia reziliensia rural no vida moris iha Estadu Timor Leste (TL), no parte refere sempre prontu atu fo apoiu no suporta, hodi Estadu Timor Leste bele hadia kondisaun sira sai dezenvolvidu.
(EST 1)
