DILI, STLTIMORLESTE.com – Governu Timor Leste (TL) liu husi reuniaun Konselhu Ministru (KM) aprova rezolusaun, hodi apoia ba Vanuatu neebe sofre Terramoto rezulta ema 23 mate no 200 kanek.
Tuir Ministru Prezidensia Konselhu Ministru (PCM), Ágio Pereira katak, ohin reuniaun KM dahuluk 2025, tanba nee em nome KM hakarak hatoo mos votus tinan foun ba hotu-hotu.
Tuir nia, KM ohin aprova rezolusaun ida hodi fo doasaun ba Vanuatu.
“Ita boot sira hatene molok tama ba tinan foun, Vanuatu Raí ida uluk apoia ita iha tempu luta, sempre iha Nasaun Unidas, agora sofre Terramoto ho magnitude 7.3, iha dia 17 Dezembru 2024, rezulta ema 23 mate, ema 200 kanek”, informa PCM, Ágio Pereira ba jornalista sira, hafoin remata reuniaun KM iha Palasiu Governu, Kuarta (08/01/2025).
Enkuantu KM aprova projetu rezolusaun Governu nee aprezenta husi Primeiru Ministru, Kay Rala Xanana Gusmão, kona-ba fó doasaun ho valór milhaun US$ 2 ba Repúblika Vanuatu.
Rai nakdoko ho magnitude 7,3 akontese iha Port Vila iha loron 17 fulan Dezembru tinan 2024, hodi rezulta ema nain 23 mate, nain 200 liu hetan kanek no estraga makaas infraestrutura esensiál sira, inklui Hospital Sentrál no rezervatóriu bee nian rua. Hodi rekonhese urjénsia ba apoia populasaun sira neebé afetadu no harii hikas área sira neebé naksobu, desizaun ida nee hatudu kompromisu Konstitusionál Repúblika Demokrátika Timor Leste nian ba solidariedade no kooperasaun entre povu sira.
(gui)
