DILI, STLTIMORLESTE.com – Governu liu husi reuniaun Konselhu Ministru (KM) aprova ona projetu Rezolusaun Governu nian neebe aprezenta husi Primeiru-Ministru (PM) Kay Rala Xanana Gusmão, hodi fo apoiu vitima inundasaun iha Bali, Indonezia.
“Konselhu Ministru aprova ona projetu Rezolusaun Governu nian neebe aprezenta husi Primeiru Ministru, Kay Rala Xanana Gusmão, neebe autoriza doasaun dolar amerikanu milhaun rua ba provinsia Bali, ho intensaun atu apoia esforsu asistensia umanitaria no rekuperasaun populasaun sira neebe afetadu,” haktuir nota komunikadu imprensa neebe STL asesu husi Governu, Sesta (12/09/2025).
Governu Timor Leste mos hatoo solidariedade ba povu, Governu Republika Indonezia, no autoridade provinsia Bali nian, haree ba efeitu destruidor husi inundasaun neebe akontese iha ilha nee iha loron hirak liu ba.
Udan boot nakfilak ba mota no rai halai, hodi rezulta pelumenus ema nain 14 mate, ema barak lakon, no ema atus ba atus mak dezlokadu.
Akontesimentu sira nee mos kauza estragu makaas ba uma, estrada, ponte no infraestrutura sira seluk, no mos estragu ba atividade ekonomika lokal, inklui area sira neebe iha importansia turistika.
Jornalista: Alberto Menezes
Editor: Xisto Mendonça
