DILI, STLTIMORLESTE.com – Governu Timorense liu husi Primeiru Ministru (PM), Kay Rala Xanana Gusmão hatoo felisitasaun ba Anthony Albanese neebe re-eleitu nuudar Primeiru Ministru (PM) Australia.
“Oferese hau nia kaloroza parabens ba ita nia vitoria eleitoral extraordinaria no ba ita nia mandatu istoriku da-ruak nuudar Primeiru Ministru Australia,” Primeiru Ministru Xanana Gusmão hatoo mensajen nee liu husi nota komunikadu neebe STL asesu husi media Gabinete Primeiru Ministru, Segunda (05/05/2025).
PM Xanana konsidera rezultadu desizivu, hanesan retornu husi Partidu Trabalhista Australianu ba Governu ho maioria ampliada ida, nuudar afirmasaun konfiansa poderoza husi povu australianu iha lideransa no iha vizaun Anthony Albanese ba nasaun inkluziva ida, justa no próspera.
Iha tempu sira mudansa no instabilidade nian, PM Xanana konsidera Anthony Albanese proporsiona sensasaun ida neebe lori serteza estabilidade ida ba Australia. Rezultadu eleisaun nee mos reprezenta endozu forte ida ba Anthony Albanese ninia abordajen polítika externa, inklui ninia kompromissu ba estabelesimentu kooperasaun Rejionál neebe pozitivu.
“Iha ita nia lideransa, relasaun entre Timor Leste ho Australia forte tebes. Ita nia apoiu ba auto determinasaun ami nia povu durante ami nia luta ba independensia iha ninia signifikadu profundu bá ami nia nasaun,” Xefe Governu Xanana subliña.
Xanana Gusmão konsidera relasaun istorika entre TL ho Australia komplexa no dala ruma dezafiadora. Tanba nee Xanana Gusmão fiar katak iha Anthony Albanese nia mandatu da-ruak nee reprezenta oportunidade unika ida atu konstrui relasaun konfiansa ida, kooperasaun no solidariedade.
“Dezenvolvimentu Greater Sunrise nee importante no fundamental tebes ba futuru Timor Leste no sei sai baze ba dezenvolvimentu sosial no ekonomiku ba longu prazu. Ita nia Deklarasaun Konjunta foin lalais nee hanesan traballu exelente husi Senadora Penny Wong, Ministra Relasaun Exterior, no Honoravel Steve Bracks AC, marka avansu signifikativu ida. Hau fiar katak ita konstrui hamutuk progressu ida nee ba benefísiu mutuu nasaun rua nian,” PM Xanana hateten tan.
Iha oportunidade nee Primeiru Ministru Xanana Gusmão hakarak estende nia konvite ba Primeiru Ministru eleitu Austrália, Anthony Albanese atu vizita Timor Leste.
“Ita nia vizita sei simu ho kalorozamente hosi povu timorense no fortalese liu tán ita nia relasaun amizade neebe forte tebes,” PM Xanana konvida.
Dala ida tan PM Xanana hatoo Parabens ba Anthony Albanese ninia abranjente no meresida vitoria eleitoral. Xanana Gusmão dezeza buat hotu diak ba Anthony Albanese atu kontinua lidera Australia no hein katak sei servisu hamutuk liu-tan atu aprofunda relasaun bilaterál no promove paz, prosperidade iha Rejiaun nee.
Durante mandatu dahuluk, Primeiru Ministru Albanese halao papel importante ida hodi aprofunda relasaun bilateral entre Timor Leste ho Australia, neebe refleta iha kooperasaun neebe aumenta iha area estratejika oin-oin, no mos dialogu neebe kontinua kona-ba esplorasaun konjunta ba rekursus iha Tasi Timor.
Tanba nee, Ministru Prezidensia Konselhu Ministru, Portavoz Governu Timorense no interlokutor Timor Leste nian iha negosiasaun kona-ba Projetu Greater Sunrise, Agio Pereira afirma, Governu Timor Leste hein atu kontinua servisu hamutuk ho Primeiru Ministru Albanese no ninia administrasaun hodi avansa objetivu komun sira no aprofunda liu tan relasaun bilateral.
Timor Leste reafirma ninia kompromisu ba parseria ida neebe bazeia ba respeitu mutuu, boa fe no vontade hamutuk hodi promove pas, estabilidade no prosperidade iha rejiaun nee no dezeja ba Primeiru Ministru Anthony Albanese atu susesu nafatin iha ezersísiu ninia mandatu, nunee mos progresu kontínuu no moris diak ba povu australianu.
(alb)
