DILI, STLTIMORLESTE.com – Governu Timor Leste (TL) iha kompromisu atu promove no kontinua implementa Deklarasaun Maubisi, neebe implementa gradualmente hahu iha tinan 2015, agora tama ba iha faze datoluk atu promove partisipasaun feto rural sira nian iha ekonomia sustentavel.
IX Governu konstitusional liu husi Sekretariu Estadu ba Igualdade (SEI) hamutuk ho linhas ministerial 17 halo lansamentu matadalan ba Implementasaun no Monitorizasaun Deklarasaun Maubisi faze III ho Linha Ministeriu Implementador sira.
Iha biban nee Sekretaria Estadu ba Igualdade, Elvina Sousa Carvalho liu husi diskursu iha salaun Hotel Timor, Tersa nee (24/06/2025) hatete, atividade nee nuudar mos asaun ida no giaun ida no operasionaliza kompromisu sira para labele sai hanesan kompromisu iha surat tahan leten deit.
“IX Governu Konstitusional ho boa vontade no iha komitmentu tomak no politika diak atu hadia moris feto rural nia inklui feto ho defisiensia sira, ohin marka pasu ida tan ba oin katak ita konsege iha ona matan dalan gia no atu implementa deklarasaun Maubisi,” dehan nia.
Atividade lansmentu nee hodi promove feto rural sira nia partisipasaun iha vida ekonomia no asesu ba rekursu sira sai hanesan objetivu prinsipal ida husi IX Governu Konstitusional nian, nuudar parte ida hodi kontribui ba kompromisu rejional no nasional sira, inklui Planu Estratejiku Dezenvolvimentu Nasional (PEDN 2011-2030), Objetivu Dezenvolvimentu Sustentavel (ODS) 5 kona-ba Igualdade Jeneru no Empoderamentu Feto.
Observasaun Final Konvensaun ba Eliminasaun Diskriminasaun ho Forma oioin Hasoru Feto (CEDAW) ba Estadu Timor Leste no Plataforma Asaun Pekin kona-ba benefisiu Ekonomiku no sosial no mos Empoderamentu Ekonomiku Feto sira nian atu promove feto sira sai forte sosial, politika no ekonomia.
Governu Timor Leste iha kompromisu atu kontinua implementa Deklarasaun Maubisi, neebe implementa gradualmente hahu iha tinan 2015 neebe agora tama ba iha faze datoluk atu promove partisipasaun feto rural sira nian iha ekonomia sustentavel.
Deklarasaun Maubisi faze datoluk nee asina husi linha ministeriu 17 no Banku Nasional Komersiu Timor Leste (BNCTL) atu hakbiit ekonomia feto no Ema ho Defisiensia sira iha area rural, feto ho defisiensia no grupu vulneravel sira seluk, neebe alina ho prioridade prinsipal tolu entre prioridade neen husi politika IX Governu Konstitusional nian kona-ba dezenvolvimentu kapital sosial inklui saude, edukasaun no moris diak ema iha setor oin-oin hanesan agrikultura, saude, turizmu, servisu publiku no infraestrutura, justisa no area importante sira seluk.
Matadalan ba iha implementasaun no monitorizasaun Deklarasaun Maubisi faze III, SEI hamutuk ho PROSIVU realiza ona koordensaun no konsultasaun ho linha ministeriu implementador Deklarasaun Maubisi III oinsa atu implementa programa sira neebe kada entidades kompromete ona iha Deklarasaun Maubisi faze III neebe sira asina.
Nunee mos Visi Embaixador Australia iha TL, Edword Wilknson hatete, kontente hodi mai partisipa iha eventu ba lanasamentu matadalan ba iha implementasaun no monitorizasaun Deklarasaun Maubisi faze III.
“Hau kontente partisipa lansamentu matadalan ba iha implementasaun no monitorizasaun Deklarasaun Maubisi faze III. Hau hakarak hatoo hau nia apresiasaun ba Governu nia lideransa no nia kompromisu neebe metin hodi hakbiit feto no labarik feto sira no grupu vuneravel sira seluk iha TL,” Katak nia.
(eme)
