DILI, STLTIMORLESTE.com – Governu Timorense liu husi Primeiru Ministru (PM), Kay Rala Xanana Gusmão hatoo parabens ba Primeiru Ministru (PM) Singapura eleitu, Lawrence Wong, iha eleisaun jeral neebe halao iha loron 3 fulan Maiu 2025.
Lawrence Wong lidera Partidu Asaun Popular (PAP) ba vitoria iha eleisaun jeral neebe halao iha loron 3 fulan Maiu tinan 2025, hametin nia mandatu hafoin simu knaar nuudar Primeiru Ministru iha fulan Maiu tinan 2024.
Ida nee akontese hafoin Lee Hsien Loong, neebe xefia ona Governu Singapura durante dekada rua, remata ona ninia mandatu.
“Rezultadu abranjente nee hanesan demonstrasaun forte ida ba konfiansa neebe povu Singapura iha ba ita-boot nia lideransa, ita-boot nia jestaun ba nasaun no ita boot nia vizaun ba futuru Singapura nian,” hatete Xefe Governu liu husi mensajen neebe STL asesu husi media Gabinete Primeiru Ministru, Segunda nee (05/05/2025).
Primeiru Ministru sublina mos papel estabilizador fundamental iha Sudeste Aziatiku no liu tan, neebe dezempena husi Singapura, no hatutan katak lideransa ita boot nia pais iha promosaun komersiu nakloke, investimentu no kooperasaun nomos defeza ba dialogu no dame, kontribui makaas ba dezenvolvimentu no prosperidade ita-nia rejiaun nian.
Primeiru Ministru Xanana Gusmão fo apresiasaun ba relasaun amizade no kooperasaun neebe metin entre Timor Leste ho Singapura no hatoo esperansa atu iha kolaborasaun metin ho Governu Lawrence Wong, nunee hametin liu-tan lasu bilaterál, esplora area foun sira neebe fo benefísiu mutua.
Xefe Governu Timorense reafirma kompromisu Timor Leste nian ba integrasaun rejional, nunee agradese ba apoiu pratiku husii Singapura, liu-liu ninia asistensia hodi hametin funsaun publika Timor Leste nian atu prepara adezaun ba ASEAN neebe reflete espiritu solidariedade no parseria neebe apoia rejiaun nee.
Primeiru Ministru konklui mensajen hodi re-afirma dezeju atu aprofunda relasaun entre país rua no hodi kontribui ba pas, estabilidade no seguransa iha rejiaun nee.
Nunee mos Ministru Prezidensia Konsellu Ministru no Portavoz Governu, Agio Pereira sublina, Singapura sai nuudar parseiru ida neebe konsistente no estratejiku ba Timor-Leste, laos deit iha prosesu adezaun ba ASEAN, maibe mos iha fahe komesimentu no kapasidade institusional.
Lideransa Primeiru Ministru Lawrence Wong reprezenta kontinuidade konfiansa no oportunidade foun ida atu haklean kooperasaun bilateral Timor Leste ho Singapura.
(alb)
