OEKUSI, STLTIMORLESTE.com – Relasiona ho politika ba konhesimentu entre Timor Leste (TL) ho Republika Indonezia (RI), servisu hamutuk buka dalan oinsa bele hametin kooperasaun ba rekonsiliasaun.
“Ita haree husi eventu festival fronteira 2024, Governu TL liu husi Sekretariu Estadu Arte no Kultura (SEAK) hamutuk ho Conselho Nacional Chega, Instituto Público (CNC, I.P) organiza sidadaun Timoroan ho sidadaun Indonezia hamtuk hodi buka solusaun hametin rekonsiliasaun,” dehan Diretor Ezekutivu CNC, i.P, Hugo Maria Fernandes liu husi nia diskursu, hafoin halo dialogu ba rekonsiliasaun da-3 iha Oekusi, Kinta (17/10/2024).
Tuir Diretor Ezekutivu CNC katak, husi rekonsiliasaun foun fazeadamente, oinsa bele tuur hamutuk hodi buka solusaun, atu hametin linha kooperasaun entre Timoroan ho sidadaun Indonezia sira, hodi hametin dame iha kultura no lisan, tanba nee vitima Timoroan ho vitima Indonezia mak sei koalia, no rekonsiliasaun ida nee asuntu estadu nian.
Tanba nee ohin halo festival fronteira 2024 iha Oekusi no Bobonaro, ho meius ida atu troka ideias ba rekonsiliasaun nian, nunee bele buka dalan hodi fortifika perspetiva sira ba hametin rekonsiliasaun entre Estadu TL ho Indonezia nian.
Entretantu Madre Guilhermina Marçal dehan, ema neebe sala nia tenke rekonhese nia sala, hodi hakbesik ba ema no husu deskulpa, tanba fasil liu atu husu deskulpa ba Maromak, maibe difisil atu hateke malu hodi husu deskulpa.
“Ita presiza rekonhese sala neebe iha atu hakbesik ba ema hodi husu deskulpa, husu perdaun, ida nee mak maneira ida neebe atu lori povu Timoroan no povu Indonezia harii no hametin rekonsiliasaun,” tenik Madre Guilhermina.
Aleinde nee, husi parte Penhasehat Forum Komunikasi Timor Timur (PFKTT), Antonio C. da Silva katak, husi rekonsiliasaun ida nee, posivel atu estadu rua nee bele husu deskulpa ba malu, tanba funu iha pasadu, nasaun rua nee vitima hotu, nunee husi perspetiva sosiolojia no antropolojia nian, sei hatudu iha tempu ikus, katak sidadaun rua bele simu malu hanesan maun ho alin.
Tanba rekonsiliasaun nee mai ho tipu barak, hanesan rekonsiliasaun ekonomia, politika, sosiolojia-antropolojia no seluk tan, ida nee bele halo entre povu Timoroan ho povu Indonezia bele hametin relasaun bilateral neebe metin nafatin, no kontinua rekonsilia objetivu neebe nakonu ho dame no pas iha rai rua.
(EST 1)
