DILI, STLTIMORLESTE.com – Governu Timor Leste ho kompanhia Woodside Energy, Ltd ohin asina ona akordu, hodi implementa projetu Timor-Leste Liquefied Natural Gas (TLNG) no Gazodotu no Dezenvolvimentu Kampu Greater Sunrise.
Kestaun nee hatoo husi Ministru Petroleu no Rekursus Minerais (MPRM) Francisco da Costa Monteiro, ba jornalista sira, iha JL Word, Area Branka, Dili, Tersa (25/11/2025).
“Orsida ita sei asiste, Ministeriu Petroleu no Rekursu Minerais lori governu nia naran asina akordu kooperasaun ida ho Woodside atu foka ba LNG Timor nian, neebe Timor-Leste iha tinan barak halo tiha ona servisu, kontinua projetu TLNG (Timor-Leste Liquefied Natural Gas) no Gazodutu no Dezenvolvimentu Kampu Greater Sunrise. Nia estuda sira neebe nesesariu halo preparasaun lubuk ida ona, ita konvida hela Woodside sira hakarak ona, sira mak espresa sira nia hakarak nee hodi bele partisipa iha ita nia prosesu nee, hodi ikus mai ita sei loke buat hotu-hotu, entermus ita nia estudu sira nee ikus mai sira mos bele halo desizaun ida definitivu ona iha tinan oin kona-ba dada kadoras mai nee ka lae, ka sira hakarak partisipa dada kadoras mai nee,” dehan MPRM, Francisco.
Nunee mos Executive Vici President Technical and energy Woodside, Julie Fallon hatutan, ida-nee hanesan onra ida atu hamutuk ohin ba okaziaun importante idanee. Asinatura ba akordu kooperasaun ida nee entre Ministeriu Petroleu no Rekursu Minerais Timor-Leste no Woodside Energy, marka marku signifikativu ida iha jornada kompartida hodi loke valor kampu gas Greater Sunrise nian.
Nia hatete, akordu ida nee reflete espíritu kolaborasaun no boa-fe neebe hafoun. Ida nee hatudu kompromisu koletivu atu avansa konseitu LNG ida neebe bazeia iha Timor neebe bele fo benefísiu ekonomiku no sosial neebe dura ba povu Timor Leste, enkuantu kria oportunidade ba kreximentu rejional no parseria.
“Tuir Akordu ida-nee, ami sei avansa estudu tekniku no komersial sira ba dezenvolvimentu LNG greenfield ida. Atividade sira nee sei lao paralelu ho negosiasaun neebe halao hela kona-ba enkuadramentu fiskal no regulatoriu sira, hodi garante katak ita harii fundasaun ida neebe metin, sustentavel, no atrativu ba investimentu. Ami kontente atu hahu viajen ida-nee hamutuk. Serbisu neebe iha oin maka signifikativu, maibe ami prontu atu hasoru ida-nee ho enerjia no determinasaun. Ida-nee mak ita-nia momentu atu nakfilak ambisaun ba asaun no halo progresu loloos ba Timor Leste no parseiru sira hotu neebe envolve,” dehan nia.
Nia mos fo rekonhese lideransa Governu Timor-Leste nian no dedikasaun husi sira hotu neebe envolve, hamutuk, forma futuru ida neebe hametin seguransa enerjetika, dudu dezenvolvimentu ekonomiku, no kria oportunidade sira ba komunidade lokal sira.
Entretantu foin lalais Governu liu husi Konselhu Ministru fo poder tomak ba Ministru Petroleu no Rekursus Minerais, Francisco da Costa Monteiro, atu, hodi Governu nia naran, asina akordu kooperasaun ho Woodside Energy, Ltd. kona-ba projetu TLNG no Gazodutu no Dezenvolvimentu Kampu Greater Sunrise.
Akordu ida-nee alina ho Governu nia esforsu estratejiku sira atu valoriza rekursus naturais nasional nian, tuir Planu Estratejiku Dezenvolvimentu 2011-2030 nian, no hatudu pasu importante ida ba avaliasaun teknika, komersial, no regulatoria konjunta kona-ba futuru unidade LNG ida iha territoriu Timor-Leste.
Jornalista: Emerenciana Pinto
Editora: Carme Ximenes
