DILI, STLTIMORLESTE.com – Governu liu husi Ministru Petroleu no Rekursus Minerais sei asina akordu ho Woodside kona-ba projetu TLNG1 Timor-Leste Liquefied Natural Gas ka Gas Natural Likifeitu Timor Leste no Gazodutu no Dezenvolvimentu Kampu Greater Sunrise.
Ministru Petroleu no Rekursus Minerais, Francisco da Costa Monteiro dehan, Konselhu Ministrus halao sorumutu iha Palasiu Governu Dili, no delibera hodi fo poder tomak ba Ministru Petroleu hodi Governu nia naran, asina akordu kooperasaun ho Woodside Energy, Ltd. kona-ba projetu TLNG1 Timor-Leste Liquefied Natural Gas – Gas Natural Likifeitu Timor Leste no Gazodutu no Dezenvolvimentu Kampu Greater Sunrise.
“Ami husu hela Konselu Ministru extra ordinariu para bele aprova projetu deliverasaun rua ida mak deliberasaun atu fo poder ba Ministru Petroliu no Minerais atu bele asina akordo koperasaun ho woodside neebe sei akontese iha Segunda oin mai, detailu ba akordu ida nee Segunda mak koalia. Hau atu dehan deit katak lori hela projetu deliberasaun ida atu asina ida nee,” dehan Ministru nee ba jornalista iha Palasiu Governu, Sabado (22/11/2025).
Akordu ida-nee alina ho Governu nia esforsu estratejiku sira atu valoriza rekursus naturais nasional nian, tuir Planu Estratejiku Dezenvolvimentu 2011-2030 nian, no hatudu pasu importante ida ba avaliasaun teknika, komersial, no regulatoria konjunta kona-ba futuru unidade LNG ida iha territoriu TL.
Negosiasaun sira neebe halao hosi Ministeriu Petroleu no Rekursus Minerais ho Woodside Energy, neebe nain ba parte husi kampu Greater Sunrise nian, kria ona kondisaun nesesaria hodi formaliza kooperasaun ida-nee, neebe fo dalan hodi halo estudu klean neebe esensial ba dezenvolvimentu projetu nee.
Ho desizaun ida-nee Governu avansa iha prosesu implementasaun ba vizaun ida neebe buka atu reforsa industrializasaun enerjetika nasional, promove diversifikasaun ekonomika, no garante katak benefísiu husi rekursus Greater Sunrise nian sei kontribui direta ba dezenvolvimentu nasional.
Jornalista: Emerenciana Pinto
Editora: Domingas Gomes
