DILI, STLTIMORLESTE.com – Kada tinan universidade iha Timor Leste (TL) produs ona graduadus neebe remata sira nian estudu, maibe oinsa mak graduadus sira bele kria servisu ba sira nian aan rasik.
“Ita produs Rekursu Umanu laos bazeia ba kampu trabalhu neebe mak ita iha, tanba kampu trabalhu nee hanesan buat ketak ida, maibe produs rekursu umanu nee sai baze importante ba ema ida-idak, agora depende ba ema ida-idak oinsa mak atu kria servisu, laos ita produs ema atu ba buka servisu deit, maibe ita produs ema oinsa kria srvisu ba ninia aan rasik,” haktuir Reitor East Timor Coffee Institute ( ETCI), Mateus Maia de Jesus ba jornalista STL, Tersa nee (20/01/2026).
Nia dehan, oinsa mak graduadus ida-idak bele kria servisu ba aan rasik, edukasaun nee atu halo saida, nee duni sira ida-idak bele kria kampu trabalhu ba sira nia aan, los duni katak tinan-tinan ensinu superior produs rekursu umanu iha TL, maibe sira idak-idak bele kria servisu ba sira nian aan, no labele hein deit buka servisu.
Iha fatin seluk, Direitor Ezekutivu TLCE, Jose Monteiro dehan, los duni too agora graduadus barak mak seidauk hetan servisu no balun ba servisu iha rai liur, tanba iha rai laran nee menus kampu servisu, tanba ho kampu servisu neebe mak menus, halo graduadus barak sai ba servisu iha rai liur.
(jac)
