DILI, STLTIMORLESTE.com – Associação da Empreendedorismo e Gestão Cultural (AEGC) hasoru malu ho Prezidente Republika (PR) Jose Ramos Horta, hodi husu apoiu oinsa servisu hamutuk prepara atividade festival internasional interkultura neebe sei halao iha palasiu.
Bainhira remata hasoru malu, Prezidente AEGC, Mirahilia Faria Sarmento ba jornalista sira Kuarta kalan (28/05/2025) hatete, mai hasoru Prezidente Republika hodi husu apoiu oinsa mak bele servisu hamutuk hodi realiza aventu festival internasional interkultura neebe sei realiza iha fulan Julhu iha Palasiu Prezidensial.
“Mai hasoru malu ho Prezidente Republika hodi husu apoiu nuudar ami nia padroero ba ami nia festival, ba festival internasional, Timor Leste nuudar uniku, tanba nee ami hakarak akumula kuaze 16 embaixada iha Timor Leste para halo eventu festival internasional interkultura,” dehan Prezidente AEGC.
Mirahilia hatete, sira sei prepara, neebe hahu tiha ona night market dia 3 Maiu iha festival iha lian português no agora atu hakat ba festival CPLP. Jogu nee koopera ho Ministeriu Desportu Arte no Kultura ba festival kultural neebe mak sei halao iha jardim resintu palasiu.
“Oferta Portugal ba jogadores partisipante jogu desportivu CPLP iha Julhu nia laran, ida nee mak ami mai koalia oinsa mak hetan kooperasaun para hamutuk ho ami hanesan realizadora ba eventu ida nee, loke tan oferta kultural ba ita nia vizitante sira,” katak nia.
Nia hatete, programa sei halao iha fulan Julhu nia laran, hahu husi dia 20 too 25 ho atividade espozisaun oin-oin ho tematika koalia kona-ba jogu CPLP sira.
Nia hatete, sira mos konvida parte husi akademika husi UNTL neebe durante nee apoiu tebes iha parte turizmu partisipa hamutuk ho estudante sira finanlista ho kareira turizmu bele mai hamutuk ho asosiasaun para bele implementa area ba area turistiku sira nee.
Iha hasoru malu nee Prezidente Republika Jose Ramos Horta konkorda ho planu no inisiativa husi AEGC no Prezidente mos hakarak alinha hamutuk ho Visi Primeiru Ministru hamutuk ho Ministru Industria hamutuk sai ekipa ida, nunee bele prepara programa kultural ida neebe sei halao iha Palasiu Prezidensial.
(eme)
